Rusiyada bahalı materiallardan smartfon və daşına bilən elektronika istehsalı üzrə ixtisaslaşan "Caviar" şirkəti ABŞ Prezidenti Donald Trampdan və onun "Bitcoin"ə təsirindən ilhamlanaraq "Trump x Bitcoin" adlı məhdud sayda "iPhone 16 Pro" modelini təqdim edib.
Oxu.Az-ın xəbərinə görə, bu barədə "Gazeta.ru" nəşrinə daxil olan press-relizdə məlumat verilib.
"Visionaries" kolleksiyasının bir hissəsi olan yeni məhsul Donald Trampın və onun "Bitcoin"in inkişafına verdiyi töhfənin şərəfinə yaradılıb. Premium smartfon məhdud tirajla cəmi 47 nüsxədə buraxılıb ki, bu da Donald Trampın 47-ci prezidentliyini simvolizə edir. Qadcetin qiymətləri isə 629 min rubldan (təxminən 12 500 manat - red.) başlayır.
"Trump x Bitcoin" PVD örtükdən istifadə etməklə tünd qara rəngdə aviasiya titanından hazırlanıb ki, bu da smartfona davamlılıq və estetik cəlbedicilik verir. Cihazın qızıl örtüklü elementləri "Trump Tower" və Trampla əlaqəli digər simvolik binalarla assosiasiya yaradır.
Dizaynın əsas xüsusiyyəti 24 karatlıq qızılla örtülmüş böyük həcmli "Bitcoin" simvoludur, hansı ki, üzərində Trampın "Bitcoin" azadlığı, suverenliyi və müstəqilliyi təmsil edir" sitatı həkk olunub.
Cihazla birlikdə video və musiqi ilə müşayiət olunan, Trampın kriptovalyuta dünyasına təsirini vurğulayan 3D relyefli "Trump Coin" kolleksiya sikkəsi də verilir.
