Niderlandın başçılıq etdiyi səkkiz Avropa İttifaqı (Aİ) ölkəsindən ibarət qrup mümkün müharibələr və fəlakətlər üçün vətəndaş hazırlığının təcili gücləndirilməsinə çağırıb.
Oxu.Az xəbər verir ki, bu barədə "Financial Times" təşəbbüsdə iştirak edən ölkələrin nazirlərinə istinadən məlumat verib.
Brüsseldə keçirilən görüşdə Niderland, Baltikyanı ölkələr, Finlandiya, İsveç, Belçika və Lüksemburqdan olan nümayəndələr böhranlara davamlılığın artırılması planlarını müzakirə ediblər. Niderlandın ədliyyə naziri Devid van Vil bildirib ki, mövcud geosiyasi vəziyyət böyük münaqişə təhlükəsini real edir.
Rəsmilərin sözlərinə görə, hərbi ssenariyə hazırlaşmaq təbii və texnogen fəlakətlərə cavab vermək qabiliyyətini avtomatik olaraq təkmilləşdirəcək. Xüsusi diqqət vahid xəbərdarlıq sistemlərinin yaradılmasına, strateji ehtiyatların toplanmasına və mühafizə strukturlarının tikintisinə yetirilir.
Niderland artıq vətəndaşların böhran zamanı yardım ala biləcəyi təcili yardım məntəqələri sistemini tətbiq edib. Bu model bütün Aİ-yə şamil edilə bilər. İclas iştirakçıları Avropa Komissiyasını qitə üçün bütün potensial təhlükələrin qiymətləndirilməsi üzrə işini sürətləndirməyə çağırıblar.
Van Vil qeyd edib ki, bəzi Aİ ölkələri əhali arasında təşviş yaratmaqdan qorxaraq hələ də hazırlığı ləngidir. Lakin təşəbbüs iştirakçıları vətəndaşların təhlükəsizliyini təmin etmək üçün təcili tədbirlərin görülməsinin vacibliyində israr edirlər.
