İran Birləşmiş Ərəb Əmirlikləri (BƏƏ) və Bəhreyndə yerləşən Amerika Birləşmiş Ştatlarının (ABŞ) hərbi bazalarına pilotsuz uçuş aparatları (PUA) ilə zərbələr endirib.
Oxu.Az "Tasnim" agentliyinə istinadən xəbər verir ki, bu barədə ölkə ordusunun mətbuat xidməti bəyanat yayıb.
Bildirilir ki, İran ordusuna məxsus onlarla PUA BƏƏ-nin Əd-Dəfra və Əl-Minhad bazalarında yerləşən ABŞ qoşunlarının dislokasiya məntəqələrinə və radiolokasiya sistemlərinə zərbələr endirib. Eyni zamanda, Bəhreynin Şeyx-İsa bazasındakı radiolokasiya obyektləri və Birləşmiş Ştatların ordusunun terrorçu qüvvələrinin toplanış mərkəzi yenidən PUA-ların kütləvi hücumuna məruz qalıb.
Bundan əlavə, İslam İnqilabı Keşikçiləri Korpusu (SEPAH) Küveyt ərazisindəki Əli əs-Saləm aviabazasına da zərbələr endirildiyini elan edib.
İslam İnqilabı Keşikçiləri Korpusu (SEPAH) İraq Kürdüstanı ərazisində yerləşən ABŞ hərbi bazalarındakı hədəflərə zərbələr endirib.
Oxu.Az xəbər verir ki, bu barədə "Fars" agentliyi SEPAH-ın rəsmi bəyanatına istinadən məlumat yayıb.
Mətndə qeyd olunur ki, SEPAH-ın quru qoşunları Ərbildəki Amerika bazalarına raketlər və pilotsuz uçuş aparatları (PUA) ilə hücum təşkil edərək, ABŞ ordusunun təmir mərkəzini, texniki avadanlıq anbarlarını məhv edib, eyni zamanda casus aerostatının yönləndirmə sistemini sıradan çıxarıb.
Bunlardan əlavə, Bəhreynin hava hücumundan müdafiə (HHM) sistemləri krallığın ərazisinə hücum etməyə cəhd göstərən İrana məxsus bir neçə PUA-nı havada zərərsizləşdirib.
