Somali piratları sahillərdə qaçırılan "Honour 25" neft tankerindəki 10 Pakistan dənizçisinin azad edilməsi üçün milyonlarla dollar fidyə tələb edirlər.
Oxu.Az xəbər verir ki, bu barədə "Hiiraan Online" portalı məlumat verib.
Jurnalistlərin məlumatına görə, tələb olunan fidyənin məbləği 3 milyon dollardır.
Qeyd edək ki, piratlar bu il iyulun 25-də Fars körfəzindən Somaliyə gedən "Honour 25" tankerini ələ keçiriblər. Hadisə Somali sahillərindən təxminən 50 kilometr aralıda, Berbera və Moqadişo şəhərləri arasında baş verib. 18 500 ton yanacaq daşıyan gəminin göyərtəsində Hindistan, İndoneziya, Myanma, Pakistan və Şri-Lanka vətəndaşlarının da olduğu 17 dənizçidən ibarət ekipaj olub.
Girov götürülən dənizçilər daha əvvəl kömək üçün müraciət edərək içməli su, qida və dərman çatışmazlığı barədə məlumat veriblər. Onların sözlərinə görə, uzun müddət girovluqda qalmaq və lazımi dərmanların olmaması səbəbindən bəzi ekipaj üzvlərinin səhhəti pisləşib.
Pakistan hakimiyyəti isə bəyan edib ki, vətəndaşlarının azad edilməsi üçün diplomatik səylər göstərir və Somali hakimiyyəti ilə də təmasdadır. Pakistanın baş nazirinin müavini və xarici işlər naziri İshaq Dar daha əvvəl dənizçilərin vətənlərinə qaytarılması üçün işlərin sürətləndirilməsini tapşırıb.
Yerli KİV qeyd edib ki, baş verən hadisə 2011-ci ildən bəri Somali sahillərində piratçılığın ilk nəzərəçarpacaq artımının əlaməti ola bilər. Həmin vaxt beynəlxalq koalisiyanın fəaliyyəti piratların aktivliyini əhəmiyyətli dərəcədə azaltmağa imkan vermişdi.
