Çərşənbə günü Sudanın Şimali Kordofan ştatındakı Şarşar kəndinə endirilən hava zərbəsi nəticəsində azı 24 dinc sakin həlak olub.
Oxu.Az xəbər verir ki, bu məlumatı cümə axşamı şahidlər və hüquq müdafiəçilərinin sözlərinə əsaslanaraq "Dabanga" radiostansiyası yayıb.
Verilən məlumata əsasən, hücum iyulun 29-da Bara şəhərinin qərbindəki yaşayış massivinə edilib. "Advocating for Darfur Victims" hüquq müdafiə qrupu həyatını itirənlərin böyük qisminin qadın və uşaqlardan ibarət olduğunu bildirib.
Hadisə şahidləri Şarşar kəndinə hava hücumunun Sudan silahlı qüvvələri tərəfindən həyata keçirildiyini bildirirlər. Lakin bu iddialar hələlik müstəqil mənbələr tərəfindən təsdiqlənməyib. Sudan ordusu isə baş vermiş aviazərbə ilə bağlı hər hansı bir açıqlama verməyib.
Eyni gündə həmin bölgədəki Əl-Cəmama qəsəbəsi "Sürətli Reaksiya Qüvvələri" (SRQ) adlı qiyamçı qrupun hücumuna məruz qalıb. Qeyri-hökumət təşkilatı olan "Sudan Həkimləri İttifaqı"nın verdiyi bilgiyə görə, hadisə zamanı ikisi qadın olmaqla 9 mülki vətəndaş öldürülüb, daha 14 nəfər isə xəsarət alıb. Silahlı şəxslər yerli bazarı, tibb mərkəzini və şəxsi mülkü talan ediblər, bundan sonra bir çox sakin şəhəri tərk edib.
Xatırladaq ki, Sudanda gərginlik 2023-cü ilin aprel ayında ordu komandanı və Suveren Şuranın rəhbəri Əbdülfəttah əl-Burhanla SRQ lideri Məhəmməd Həmdan Daqalo arasındakı ziddiyyətlər zəminində yaranıb.
Paytaxt Xartumda start götürən silahlı toqquşmalar qısa zamanda ölkənin digər ərazilərini də əhatə edib. Birləşmiş Millətlər Təşkilatının (BMT) hesabatlarına əsasən, müharibə başlayandan bu yana azı 59 min insan ölüb, 13 milyondan artıq şəxs isə öz yurdunu tərk edərək məcburi köçkün düşüb. Hazırda Şimali Kordofan əyaləti hərbi əməliyyatların ən intensiv getdiyi bölgələrdən biri sayılır.
