ABŞ-nin Milli Avtomobil Yollarında Hərəkətin Təhlükəsizliyi İdarəsi (NHTSA) "Amazon" korporasiyası tərəfindən hazırlanmış elektriklə işləyən robot-taksilərin kommersiya məqsədilə istismarı üçün "Zoox" şirkətinə müvəqqəti icazə verib.
Oxu.Az "Kommersant" nəşrinə istinadən xəbər verir ki, bu, sükan çarxı və əyləc pedalı olmayan avtonom taksilər üçün verilən ilk belə icazədir.
Məlumata görə, nəqliyyat vasitələri hərəkət zamanı yalnız məsafədən nəzarət edən operator tərəfindən idarə olunur. NHTSA eyni zamanda bu tip pilotsuz avtomobillər üçün ümumi tənzimləmə standartlarının hazırlanması üzərində də çalışır.
Hazırda bu cür robot-taksilər Las-Veqas və San-Fransiskoda sınaq rejimində sərnişinləri ödənişsiz daşıyır. "Zoox" avqust ayında Las-Veqasda ödənişli robotaksi xidmətini istifadəyə verməyi planlaşdırır. Daha sonra xidmətin ABŞ-nin digər ştatlarında da fəaliyyətə başlaması nəzərdə tutulur.
NHTSA-nın verdiyi icazə "Zoox"a yaxın iki il ərzində hər il 2 500-dək robot-taksini istismara buraxmaq imkanı yaradır.
Qeyd edək ki, "Zoox" robot-taksilərində oturacaqlar qarşı-qarşıya yerləşdirilib və avtomobil saatda 120 kilometrədək sürət yığa bilir.
