İstanbul məhkəməsinin Bosfor sahilindəki Tarabya rayonunda yerləşən tarixi sarayın çar Rusiyasının diplomatının vərəsələrinə verilməsi ilə bağlı qərarı yuxarı instansiya tərəfindən ləğv edilib. İstanbul regional məhkəməsinin hüquqi palatasının qərarına əsasən, iş yenidən baxılması üçün birinci instansiya məhkəməsinə qaytarılacaq.
Oxu.Az xəbər verir ki, bu barədə "Sabah" nəşri yazıb.
İddianın iştirakçıları dörd tərəfdən ibarətdir: Türkiyə Xəzinədarlığı, Vəqflər Baş İdarəsi, Rusiya Federasiyası və diplomatın varisləri. Nəşrin yazdığına görə, Moskva tərəfi Rusiya səfirliyinin əməkdaşının Fransada yaşayan vərəsələrinə saray üzərində hüquqların verilməsi haqqında məhkəmə qərarından apellyasiya şikayəti verib. Şikayətə 20 gün ərzində baxılıb, aşağı instansiya məhkəməsinin qərarı, həmçinin tərəflərin dinlənilməməsi, bəyanatlarının və sübutlarla bağlı hüquqlarının məhdudlaşdırılması səbəbindən ləğv edilib.
Qeyd edək ki, "Sabah" qəzeti noyabrın 1-də yazıb ki, İstanbul məhkəməsi 17 il davam edən işdən sonra Tarabyadakı saray üzərində hüquqları 1868-ci ildə onu almış çar Rusiyasının diplomatının vərəsələrinə verilməsini qərara alıb. Qəzetin məlumatına görə, Rusiya səfirliyinin əməkdaşı Nikolay Sveçin binanı və təxminən 10 hektar ərazini fransalı ailədən alıb. Saray bir müddət Rusiya diplomatik missiyasının binalarından biri kimi istifadə edilib. Qəzetin iddiasına görə, Türkiyə qurumlarının və Rusiya tərəfinin binaya dair iddiaları mülkiyyət sənədləri, fərmanlar, diplomatik yazışmalar və beynəlxalq hüquq normalarının təhlili əsasında məhkəmə tərəfindən rədd edilib.
Rusiyanın Türkiyədəki səfirliyi elə həmin gün "Sabah" qəzetinin məqaləsini təkzib edib və Türkiyə Respublikasının 518 nömrəli Mətbuat Qanunu əsasında yazıya düzəliş olunmasını təklif edib. Səfirliyin məlumatında qeyd olunub ki, "Sabah" məqaləsində qeyd edilən faktlar bilərəkdən təhrif edilib və heç bir şəkildə həqiqəti əks etdirmir. "Müvafiq iş Türkiyənin məhkəmə orqanlarında baxılmaqdadır, yekun qərar çıxarılmayıb", - deyə diplomatik nümayəndəlikdən bildirilib.
