"Telegram" rekord məbləğdə pul qazanıb

"Telegram" mesenceri Fransada təsisçisi Pavel Durovun cinayət təqibinə baxmayaraq, 2024-cü ilin sonuna kimi 540 milyon dollar mənfəət əldə edib.

Oxu.Az xəbər verir ki, bu barədə "Financial Times" qəzeti məlumat verib.

"Şirkət ilk dəfə olaraq bu göstəriciyə çatıb, gəlirini 4 dəfə artıraraq 1.4 milyard dollara çatdırıb", - deyə şirkət investorlara təqdimatında bildirib.

"Telegram"ın 2024-cü ildəki gəliri digər gəlirlərlə yanaşı, reklam (250 milyon dollar), premium abunələr (292 milyon dollar), həmçinin tərəfdaşlıq layihələri və ekosistemin inkişafı hesabına əldə edilib. Məlumata görə, mənfəət, həmçinin platforma daxilində ödənişlərdə istifadə olunan "Toncoin" kriptovalyutası ilə bağlı gəlirlər hesabına təmin edilib.

Bundan əlavə, "Telegram"ın uğuru 2024-cü ilin avqustundan Fransada istintaq altında olan Durovun ciddi hüquqi problemləri fonunda baş verib.

Şirkət, öz məlumatlarına görə, indi ayda 1 milyarddan çox aktiv istifadəçiyə xidmət göstərir və 60 nəfərlik komanda tərəfindən idarə olunur.