"Türkiyədə keçiriləcək danışıqlarda Rusiya lideri Vladimir Putin Ukraynanın kapitulyasiyasını (təslim olmasını), NATO-ya üzv olmaqdan imtina etməsini, Kiyevdə hakimiyyətin dəyişdirilməsini, Krım, Xerson, Zaporojye və şərqdə yerləşən daha iki region da daxil olmaqla ərazilərin güzəştə gedilməsini tələb edəcək".
Oxu.Az-ın xəbərinə görə, bu barədə "The Times" nəşri Qərbin 30 günlük təcili atəşkəs çağırışlarına Kremlin reaksiyasını şərh edərkən yazıb.
Məqalədə qeyd edilib ki, Moskva münaqişənin ilkin səbəblərinin aradan qaldırılmasında israr edir və Putinin fikrincə, danışıqlar yalnız Rusiya üçün təhlükəsizlik zəmanətindən sonra mümkündür.
Nəşr ABŞ-nin vitse-prezidenti Cey Di Vensin sözlərindən də sitat gətirərək bildirir ki, Rusiya hələ nəzarəti altında olmayan bir şeyi tələb edir.
"Sadalanan regionlardan bir hissəsi Rusiya ordusunun nəzarəti altında deyil", - deyə nəşr qeyd edib.
Jurnalistlər vurğulayırlar ki, Volodimir Zelenskinin danışıqların yalnız Ukrayna şəhərlərinə hücumların dayandırılmasından sonra mümkün olması ilə bağlı konkret mövqeyinə baxmayaraq, Donald Tramp Kiyev və Moskva nümayəndələri arasında təxirəsalınmaz görüşün keçirilməsini tələb edir.
"Zelenski Putinə artıq bu cümə axşamı (15 may - red.) Türkiyədə danışıqlar aparmağı təklif edib", - deyə nəşr xatırladıb.
Bununla belə, Kiyev belə bir dialoqun məqsədəuyğunluğuna şübhələrini gizlətmir. Jurnalistlərlə söhbəti zamanı Ukrayna Prezident Ofisinin müşaviri Mixail Podolyak belə danışıqları "böyük illüziya" adlandırıb, Avropa liderləri isə Moskvanı hərbi əməliyyatları dayandırmayacağı təqdirdə yeni sanksiyalarla hədələyiblər.
Nəşr məqalənin yekununda bildirir ki, Kreml öz tələblərini həftəbəhəftə təkrarlayır və sadəcə mətni dəyişir.
