Qazaxıstan Prezidenti Kasım-Jomart Tokayev Xəzər dənizində hərbi təlimlər zamanı 14 hərbçinin ölümü ilə bağlı nazirliyin araşdırılması fonunda müdafiə nazirinin müavini, polkovnik Asker Beysenovun vəzifəsindən azad edilməsinə dair sərəncam imzalayıb.
Oxu.Az-ın xəbərinə görə, bu barədə Qazaxıstan prezidentinin mətbuat xidmətindən məlumat verilib.
Asker Beysenov 2023-cü ildən bəri müdafiə nazirinin müavini vəzifəsində çalışıb. Tokayevin əmri ilə Tatyana Savelyeva Qazaxıstan müdafiə nazirinin yeni müavini təyin edilib - oktyabrın 7-də o, Kurultayın (birpalatalı parlament) deputatı səlahiyyətlərinə son verib, iclasda səbəblər izah edilməyib. Savelyeva bir aydan bir qədər çox müddətdə Kurultayın deputatı olub, avqustun 27-də hakim "Adilet" partiyasından mandat alıb. Bundan əvvəl o, 2023-cü ildən bu il ləğv edilənə qədər keçmiş parlamentin aşağı palatasının (Majlis) deputatı olub. Majlisdə o, maliyyə və büdcə komitəsinə sədrlik edib, bundan əvvəl isə Qazaxıstan maliyyə nazirinin müavini olub.
Xatırladaq ki, sentyabrın 24-də Qazaxıstanın Xəzər dənizi sahilində keçirilən təlimlər zamanı 17 hərbçini su aparıb. Onlardan 14-ü həlak olub, üçü xilas edilib.
İnsidentdən sonra Tokayev Müdafiə Nazirliyinə araşdırma aparılması barədə göstəriş verib. Prezidentin mətbuat xidməti istintaq zamanı 13 cinayət işinin açıldığını bildirib. Həmçinin müdafiə nazirini və Baş Qərargah rəisini dəyişib, HDQ-nin baş komandanını isə vəzifəsindən azad edib.
Hadisə ilə bağlı cinayət işi üzrə istintaq davam edir. DİN-in daha əvvəl bildirdiyi kimi, təqsirləndirilən şəxslər arasında HDQ-nin baş komandanının birinci müavini və Müdafiə Nazirliyinin bir sıra vəzifəli şəxsləri var.
Hərbi Dəniz Qüvvələrinin keçmiş baş komandanı, onun birinci müavini və Müdafiə Nazirliyinin daha dörd əməkdaşı saxlanılıblar.
