ABŞ Prezidenti Donald Tramp avropalı müttəfiqləri Hörmüz boğazının açılması üzrə koalisiyaya qoşulmadıqları təqdirdə Ukraynaya silah tədarükünü dayandırmaqla hədələyib.
Oxu.Az bu barədə "Financial Times" nəşrinə istinadən xəbər verir.
ABŞ və İsrail fevralın sonunda İrana zərbələr endirdikdən sonra Tehran Hörmüz boğazını - dünya neftinin beşdə birinin keçdiyi strateji marşrutu - faktiki olaraq bağlayıb.
Tramp administrasiyası NATO ölkələrinin hərbi-dəniz qüvvələrini gəmiçiliyin bərpasına kömək etməyə çağırıb, lakin Avropa paytaxtları münaqişəni "bizim müharibəmiz deyil" adlandıraraq bundan imtina ediblər.
Buna cavab olaraq Tramp Avropa ölkələrinin maliyyələşdirdiyi NATO-nun PURL (Ukraynanın Prioritet Ehtiyacları Siyahısı) proqramı vasitəsilə Ukraynaya silah tədarükünü dayandırmaqla hədələyib. Danışıqlarla tanış olan üç məmurun sözlərinə görə, bu addım müttəfiqləri mövqelərini dəyişməyə məcbur edib.
NATO-nun baş katibi Mark Rütte böhranın həllində əsas rol oynayıb. Nəşrə danışan mənbələrin sözlərinə görə, Rütte Tramp və ABŞ dövlət katibi Marko Rubio ilə bir neçə telefon danışığı aparıb, həmçinin ayrıca Fransa, Almaniya və Böyük Britaniyanı güzəştə getməyə çağırıb.
Nəticədə martın 19-da NATO-nun əsas üzvləri də daxil olmaqla bir qrup ölkə təcili olaraq birgə bəyanat yayaraq Hörmüz boğazından təhlükəsiz keçidi təmin etmək üçün müvafiq səylərə töhfə verməyə hazır olduqlarını bildirib. Bəyanat tələsik hazırlandığı üçün digər dövlətlər də sonradan ona qoşulublar.
