ABŞ Prezidenti Donald Tramp Rusiyanın Ukrayna üzrə sülh sazişinin əldə edilməsinə hazır olduğuna inandığını, lakin Ukrayna Prezidenti Volodimir Zelenski ilə razılaşmanın daha çətin olduğunu bildirib.
Oxu.Az-ın xəbərinə görə, bu sözləri Donald Tramp Ağ Evin Oval kabinetində jurnalistlərlə söhbətində deyib.
Tramp açıq şəkildə ifadə edib ki, onun üçün Rusiya tərəfi ilə danışıqlar aparmaq daha asandır, nəinki Ukrayna tərəfi ilə.
"Düşünürəm ki, Rusiya hazırdır və çoxları deyirdilər ki, Rusiya hər şey etməyə hazırdır. Və zənnimcə, biz Rusiya ilə razılığa gəldik. Zelenski ilə razılığa gəlməliyik", - deyə ABŞ prezidenti vurğulayıb.
Onun qeyd etdiyinə görə, əvvəlcə elə hesab edib ki, Volodimir Zelenski ilə ortaq dil tapmaq daha asan olacaq.
"Hələlik bu, daha mürəkkəbdir... Amma mən düşünürəm ki, biz hər iki tərəflə iş aparırıq. Ümid edirəm ki, onlar bunu edəcəklər, çünki mən vəziyyəti xilas etmək istəyirəm və bildiyiniz kimi, biz çox pul xərcləmişik, lakin söhbət çox sayda insandan gedir", - deyə Donald Tramp əlavə edib.
ABŞ lideri vurğulayıb ki, bu münaqişədə onun Ukrayna və Rusiya arasında favoritləri yoxdur. Onun əsas arzusu müharibənin mümkün qədər tez başa çatmasıdır.
