Trampın həyat yoldaşı ilə bağlı maraqlı məqamlar ortaya çıxdı: Ağ Evdə qalmaqdan qorxur

ABŞ Prezidenti Donald Trampın həyat yoldaşı Melaniya Tramp Ağ Evdə nadir hallarda görünür.

Oxu.Az-ın xəbərinə görə, bu barədə köşə yazarı Şon Makkriş "New York Times" nəşri üçün yazdığı məqaləsində bəhs edib.

Məqalə müəllifi qeyd edir ki, Trampa qarşı sui-qəsd cəhdləri onsuz da uzun illərdir ailəsinin təhlükəsizliyindən narahat olan Melaniya Trampı çox qorxudub.

Şon Makkrişin sözlərinə görə, cütlük üçün xüsusilə çətin məqam Trampın pornoulduza pul ödəməkdə ittiham olunduğu məhkəmə işi olub - bunun fonunda Melaniya ərinin seçkiqabağı kampaniyasından uzaq durub.

"O, 108 gün əvvəl ərinin andiçmə mərasimindən sonra Ağ Evdə 14 gündən az vaxt keçirib. Digərləri bunun hələ "səxavətli" qiymətləndirmə olduğunu söyləyirlər", - deyə o bildirib.

Makkriş qeyd edib ki, birinci xanım Ağ Evdə yaşamaq istəmir - ABŞ prezidentlərinin həyat yoldaşlarının, adətən, yaşadıqları otaqların pəncərələri axşamlar həmişə qaranlıq olur. Melaniya əsasən Manhettendəki "Trump Tower"də və ya Floridadakı villasında vaxt keçirir.

"Biz Bess Trumendan sonra bu dərəcədə gözdənuzaq qalan birinci xanım görməmişdik", - deyə Ohayo Universitetinin tarixçisi Ketrin Cellison vurğulayıb.

"İcrası, adətən, birinci xanıma həvalə edilən bir sıra vəzifələri Tramp öz üzərinə götürüb. Xüsusilə, dövlət başçısı Ağ Ev üçün lampalar seçir, dizaynla məşğul olur və Şərq qanadında ekskursiya qruplarını qarşılayır", - deyə Şon Makkriş əlavə edib.