Türkiyədə İstanbul polisi Almaniyadan olan üç vətəndaşın zəhərlənərək ölməsi ilə bağlı araşdırma çərçivəsində daha bir neçə nəfəri saxlayıb.
Oxu.Az NTV telekanalına istinadən xəbər verir ki, turistlərin qaldığı hotelin əməkdaşı, həmçinin orada dezinseksiya (həşəratlarla mübarizə - red.) aparan şirkətin iki əməkdaşı saxlanılıb.
Ümumilikdə, saxlananların sayı yeddi nəfər təşkil edib ki, onlardan dördü turistlərin ziyarət etdiyi iaşə müəssisələrinin işçiləridir.
Polis turistlərin həşəratların məhv edilməsi işlərində istifadə olunan maddələrdən zəhərlənməsi ehtimalını araşdırır. Daha əvvəl bildirilmışdi ki, noyabrın 9-da Fatih rayonundakı "Harbour suits old city" mehmanxanasında Almaniyadan olan ailə qalıb, onların üç üzvü, o cümlədən üç və altı yaşlarında iki uşaq Beşiktaş rayonunda olan kafelərdən birində yedikləri midiyalar və kartofdan zəhərlənərək ölüblər. Ailənin üzvlərindən biri xəstəxanaya reanimasiya şöbəsinə yerləşdirilib.
İstanbulda Almaniyadan gəlmiş bir turist ailəsinin ölümünə qida zəhərlənməsi deyil, kənar müdaxilələr də səbəb ola bilər.
Oxu.Az verir ki, bununla bağlı "Sabah" qəzeti yerli hüquq-mühafizə orqanlarına istinadən məlumat yayıb.
Bildirilir ki, ilkin nəticələr zəhərlənmə ilə bağlı qəti diaqnozun olmadığını göstərir.
Bu da prokurorluğu təhqiqatı genişləndirməyə və ölüm hadisəsinə kənardan müdaxilənin mümkünlüyünü nəzərdən keçirməyə vadar edib.
Nəşrin məlumatına görə, istintaq zamanı ərazidəki küçədə yemək satan şəxslərin əksəriyyəti saxlanılıb.
Xəbərdə bildirilir ki, dörd nəfərdən ibarət ailə tətil üçün Türkiyəyə gedib və onlar küçədə satılan yeməklərdən dadıblar. Noyabrın 12-nə keçən gecə onlar özlərini pis hiss etməyə başlayıblar.
Qida zəhərlənməsi şübhəsi ilə xəstəxanaya çatdırılan iki uşağın və onların analarının həyatını xilas etmək mümkün olmayıb. Ölən uşaqların ataları isə ağır vəziyyətdə reanimasiyadadır.
