ABŞ İrana qarşı mümkün hərbi əməliyyatlarda istifadə ehtiyacını nəzərə alaraq, Tayvana 14 milyard dollar dəyərində silah tədarükünü müvəqqəti dayandırıb.
Oxu.Az xəbər verir ki, bu barədə ABŞ Konqresi Senatının Təxsisatlar Komitəsində keçirilən dinləmələrdə Hərbi Dəniz Qüvvələri naziri vəzifəsini icra edən Hanq Kao məlumat verib. Tayvana 14 milyard dollarlıq silah satışının ləngiməsi ilə bağlı sualı cavablandıran Kao qeyd edib ki, bu barədə sözügedən ölkənin nümayəndələri ilə danışmayıb.
"Lakin onlara müəyyən silahların satışını təmin etmişik. Hazırda isə "Epik qəzəb" əməliyyatı üçün kifayət qədər silahımızın olduğuna əmin olmaq məqsədilə tədarükü dayandırmışıq. Ehtiyatımız yetərlidir, sadəcə lazım olan hər şeyin əlimizdə olduğundan əmin olmaq istəyirik", - deyə o bildirib.
O, həmçinin qeyd edib ki, administrasiya zəruri hesab etdiyi vaxt xaricə silah tədarükü bərpa olunacaq.
Qeyd edək ki, ötən həftə Çinə baş tutan dövlət səfərinin yekunlarına əsasən, ABŞ prezidenti ÇXR lideri Si Cinpinlə Tayvana 14 milyard dollarlıq silahın mümkün tədarükünü müzakirə etdiyini, lakin bu müqavilə ilə bağlı hələ yekun qərar vermədiyini bildirib.
