Venesuelada korrupsiya QALMAQALI: Müxalifət USAID pullarını çevrilişlərə xərcləyib

Sağçı müxalifət ABŞ-nin Beynəlxalq İnkişaf Agentliyindən (USAID) aldığı maliyyə vəsaitlərindən Venesuela hökumətinə qarşı çevriliş cəhdi üçün istifadə edib.

Oxu.Az-ın verdiyi məlumata görə, bu barədə Bolivar Respublikasının Baş prokuroru Tarek Vilyam Saab "Cable a Tierra" radiosuna müsahibəsində bildirib.

"Venesuelanın USAID-dən pul alan sağçı ekstremistləri qanuni hökuməti devirmək məqsədilə bu vəsaitlərdən istifadə etdiklərinə görə istintaq altındadırlar", - deyə Saab qeyd edib.

O bildirib ki, hazırda özünü prezident elan etmiş Xuan Quaydonun qondarma müvəqqəti hökumətinin USAID vəsaitlərindən qanunsuz istifadəyə imkan verən korrupsiya əməlləri ilə bağlı araşdırmalar aparılır.

Saab həmçinin qeyd edib ki, 2023-cü ildə "Interpol"a Quaydo və onun əlaltılarının "aktivlərin oğurlanması, hakimiyyətin qəsb edilməsi, sui-qəsd, terror aktlarına yardım, xəyanət" ittihamları ilə həbs edilməsi və Venesuela ədalət mühakiməsinə təhvil verilməsi üçün sorğu göndərilib.