Yaponiyada zəlzələdə ölənlərin sayı artdı, 124 saat sonra dağıntı altından qadın çıxarıldı - YENİLƏNİB + VİDEO

Yaponiyada altıncı gündür davam edən silsilə zəlzələlər nəticəsində ölənlərin sayı 126-ya çatıb.

Bu barədə Yaponiyanın regional hakimiyyət orqanları məlumat yayıb.

Xilasedicilər zəlzələlər nəticəsində uçan evin dağıntıları altında 124 saat qalan qadını sağ tapıblar.

Qeyd edək ki, xilas edilən qadının 90-dan çox yaşı var. O, ağır vəziyyətdə xəstəxanaya yerləşdirilib.

10:00

Yaponiyada altıncı gündür davam edən silsilə zəlzələ nəticəsində ölənlərin sayı 110-a çatıb.

Məlumata görə, ən azı 516 nəfər müxtəlif dərəcəli bədən xəsarətləri alıb. Təcili yardım xidmətləri hələ də 222 sakini tapa bilməyiblər. Yaponiya özünümüdafiə qüvvələrinin də cəlb olunduğu fəlakət bölgəsində axtarış-xilasetmə əməliyyatları davam etdirilir. Ən böyük ziyan İşikava prefekturasına dəyib. Orada 250-dən çox ev dağılıb,  300-dən çox tikili isə yanıb. Həmin bölgədə elektrik enerjisi, su və yanacaq çatışmazlığı davam edir.

Qeyd edək ki, Yaponiyada zəlzələlər nəticəsində ölənlərin sayı son yeddi ildə ilk dəfə olaraq yüz nəfəri ötüb.

Xatırladaq ki, 2016-cı ildə ölkənin cənub-qərbindəki Kumamoto prefekturasında 273 nəfərin ölümünə səbəb olan dağıdıcı zəlzələ qeydə alınıb.

Mənbə: TASS