Yeni Roma Papası XIV Leo kimdir? - DOSYE

Kardinal Robert Frensis Prevo Müqəddəs Pyotr taxtına çıxan ilk amerikalı olub. Onun seçimi keçirilən son konklavda həyata keçirilib.

Oxu.Az TASS-a istinadən xəbər verir ki, Robert Frensis Prevo latın amerikalı kökləri olan ABŞ-li kardinal, yepiskopların işləri üzrə qurumun prefekti, avqustinçi və 2023-cü ildə kardinal rütbəsinə yüksəldilən son şəxslərdən biridir.

O, XIV Leo adını qəbul edib.

69 yaşlı Robert Frensis Prevo Çikaqoda italyan, fransız və ispan mənşəli ailədə anadan olub. Filadelfiyada riyaziyyat üzrə dərəcə alıb və 1977-ci ildə Müqəddəs Avqustin ordeninə qoşulub, sonradan ordenin dünya üzrə baş rahibi olub.

Onun dini xidmətinin əhəmiyyətli hissəsi Peruda keçib, burada səmərəli və çoxşaxəli kilsə xadimi kimi şöhrət qazanıb. Mülayimliyi ilə seçilir. Sələfi Fransisk kimi, o da Latın Amerikası ilə əlaqəlidir.

Əvvəlki XIII Leo adını daşıyan Papa (1878-1903) sosial doktrinanın banisi idi. Yeni Papa da ilk çıxışında sülhdən və sələfi Fransiskin xəttinin davam etdirilməsindən danışıb.