Şabran rayonunda bıçaqlanma hadisəsi baş verib.
Oxu.Az-ın məlumatına görə, hadisə rayonun Çölquşçu kəndi ərazisində qeydə alınıb. Rayon sakini, 1993-cü il təvəllüdlü Tərxan Mirzəyev tanışı Orxan Ağayevi (soyadlar şərtidir - red.) bıçaqlayıb.
Tərxan Şabran şəhərində taksi fəaliyyəti ilə məşğul olub. Orxan tanışı Tərxandan xahiş edib ki, mütəmadi olaraq onu və həyat yoldaşını lazımi ünvanlara aparıb gətirsin. Tərxan da razılıq verib. Bir müddət Tərxan ailəyə taksi kimi xidmət göstərəndən sonra Orxan həyat yoldaşı ilə Tərxanın münasibətindən şübhələnib. O, T.Mirzəyevə bildirib ki, bundan sonra həyat yoldaşını harasa aparmasın. Amma buna baxmayaraq Orxanın həyat yoldaşı yenə də Tərxanın avtomobilindən taksi kimi istifadə edib. Bunu eşidən Orxan Tərxanı çağıraraq onunla mübahisə edib. Tərxan bildirib ki, onun həyat yoldaşı ilə heç bir yaxın münasibəti olmayıb. Amma buna baxmayaraq Orxan ona inanmayıb və bir neçə dəfə Tərxana zəng vurub, onu hədələyib. Həmçinin O.Ağayev baş verənlərə görə ailəsindən ayrılıb.
Bir müddətdən sonra Orxan Tərxana yenidən zəng vurub onu hədələyəndə sonuncu onu şəhər ərazisindəki "Qayalı" marketin qarşısına görüşə çağırıb. Orxan həmin yerə gələrək Tərxanla görüşüb. Tərxan onu avtomobilinə əyləşdirərək Çölquşu kəndi ərazisindəki otlaq sahəsinə aparıb. Orada mübahisə yenidən başlayıb və tərəflər arasında dava düşüb. Dava zamanı Tərxan avtomobilində gəzdirdiyi xəncərlə Orxana xəsarət yetirib. Daha sonra T.Mirzəyev onu avtomobilinə əyləşdirərək keçmiş həyat yoldaşının yaşadığı evə gətirib. Yaxınları isə O.Ağayevi xəstəxanaya yerləşdiriblər.
Polis əməkdaşlarının keçirdikləri tədbirlərlə hadisəni törətməkdə şübhəli bilinən T.Mirzəyev saxlanılıb. Faktla bağlı cinayət işi başlanılıb və iş məhkəməyə göndərilib. Məhkəmə istintaqı dövründə tərəflər arasında barışıq elan olunub. Məhkəmənin hökmü ilə T.Mirzəyev 3 il 9 ay azadlıqdan məhrum olunub. Məhkəmə Cinayət Məcəlləsinin 70-ci maddəsini tətbiqi ilə onun cəzasını şərti hesab edib.
