Naxçıvanda dönərdən zəhərlənənlərin vəziyyəti açıqlanıb.
Bu barədə Oxu.Az-ın sorğusuna cavab olaraq Naxçıvan Muxtar Respublikasının Tibb Müəssisələrini İdarəetmə Birliyindən məlumat verilib.
"Martın 21-i Naxçıvan MR Yoluxucu Xəstəliklər Mərkəzinin Təcili Tibbi Yardım şöbəsinə qida zəhərlənməsi diaqnozu ilə üçü az yaşlı olmaqla 6 nəfər şəxs daxil olub. Şəxslərin şikayətləri ürəkbulanma, qusma, mədə nahiyəsində ağrılar olub. Toplanılan anamnezə əsasən xəstələrin şəhərdə fəaliyyət göstərən kafelərdən birində dönər yediyi məlum olub. Xəstələrə yardım göstərilib, tam klinik sağalma ilə evə buraxılıblar", - deyə məlumatda qeyd olunub.
Naxçıvanda dönərdən kütləvi zəhərlənmə olub.
Oxu.Az xəbər verir ki, Naxçıvan Yoluxucu Xəstəliklər Mərkəzindən Naxçıvan Muxtar Respublikasının Qida Təhlükəsizliyi Agentliyinə daxil olmuş məlumata əsasən, ikisi azyaşlı olmaqla altı nəfərin dönərdən zəhərləndiyi bildirilib.
Agentlik əməkdaşlarının apardığı araşdırmalar zamanı hadisənin Naxçıvan şəhəri H.Əliyev prospektində yerləşən kafedə baş verdiyi məlum olub.
Naxçıvan Muxtar Respublikasının Qida Təhlükəsizliyi Agentliyindən Oxu.Az-a bildirilib ki, faktla bağlı araşdırmalar aparılır. Nəticələr barədə ictimaiyyətə ətraflı məlumat veriləcək.
Aygün Mirakif
