Ağır qəza iki qardaşın ölümü ilə sonlandı - Biri Vətən müharibəsi iştirakçısı olub

Bu gün Şabran rayonunun Şahnəzərli kəndi ərazisindən keçən avtomobil yolunun 135-ci km-də qeydə alınan ağır yol-nəqliyyat hadisəsi zamanı həlak olan iki qardaşdan biri, Fərzəliyev Elməddin Vətən müharibəsi iştirakçısı olub.

Oxu.Az xəbər verir ki, hadisə zamanı həlak olan qardaşlar Şabran rayonunun Gəndov kənd tam orta ümumtəhsil məktəbinin məzunları olublar.

Fərzəliyev Elməddin və Fərzəliyev Əmrəlinin fotolarını təqdim edirik:

16:16

Şabran rayonunda iki nəfərin ölməsi ilə nəticələnən yol-nəqliyyat hadisəsinin baş verməsinə ilkin səbəb sürücünün idarəetməni itirməsi olub.

Bu məlumat Baş Dövlət Yol Polisi İdarəsindən Oxu.Az-ın sorğusuna cavab olaraq verilib.

"Hadisə bu gün saat 08:00-da, Bakı-Quba-Dağıstan sərhədi avtomobil yolunun Şabran rayonunun Şahnəzərli kəndi ərazisindən keçən 135-ci km-də qeydə alınıb.

Sürücü Əmralı Qədmalı oğlu Fərzəliyev idarə etdiyi VAZ-21154 markalı 99-TH-175 dövlət nömrə nişanlı avtomobilin idarəetməsini itib və yoldan çıxan avtomobil ağaca çırpılıb. Nəticədə sürücü özü və sərnişini olan qardaşı Elməddin Qədmalı oğlu Fərzəliyev Hadisə yerindəcə həlak olublar. Faktla bağlı araşdırma aparılır", - deyə məlumatda bildirilir.

Əzizə İsmayılova

14:46

Şabranda avtomobil ağaca çırpılıb, iki qardaş ölüb.

Oxu.Az xəbər verir ki, Gəndob-Yalama avtomobil yolunun Şabran rayonu ərazisindən keçən hissəsində ağır yol-nəqliyyat hadisəsi baş verib.

Belə ki, VAZ-21015 markalı minik avtomobilinin hərəkətdə olan zaman yol kənarındakı ağaca çırpılması nəticəsində, Şabran rayonu, Gəndob kənd sakinləri Elməddin Fərzəliyev və onun qardaşı Əmrəli Fərzəliyev həyatlarını itiriblər.

Hadisə ilə bağlı araşdırma aparılır.