Sakinlər Suraxanı rayonu, Yeni Günəşli yaşayış massivi, Samir Cəfərov küçəsində yerləşən "Çayka" restoranından şikayətçidirlər. Onların sözlərinə görə, restorandan gecə saatlarına qədər gələn musiqi səsləri rahatlıqlarını pozur.
"Səsdən evdə oturmaq mümkün deyil. Evdə körpə uşağım var. Hava yaxşı olsa da, səsə görə pəncərəni aça bilmirəm. İnsanlar işdən gəlir, istirahət etmək istəyirlər, amma səs mane olur. Buna nəzarət etsələr, yaxşı olar", ‒ sakinlərdən biri söyləyib.
Bəs bununla bağlı qanun nə deyir?
Hüquqşünas Hikmət Əliyev bildirib ki, kafe, restoran və digər ictimai iaşə obyektlərində yaranan səs-küy üçün qanunvericiliklə müəyyən edilmiş xüsusi normativlər mövcuddur. Bu normalara nəzarəti Ekologiya və Təbii Sərvətlər Nazirliyi həyata keçirir:
"Əgər Nazirlik tərəfindən keçirilən reydlər zamanı, yaxud da vətəndaşların şikayətləri əsasında aparılan yoxlamalarda səs-küyün normanı aşdığı müəyyən edilərsə, məsul şəxslər İnzibati Xətalar Məcəlləsinin 275.2-ci maddəsinə əsasən, məsuliyyətə cəlb edilə bilərlər. Əgər bu səs-küy və narahatlıq mütəmadi xarakter daşıyarsa, inzibati məsuliyyətlə yanaşı, sakinlər müəyyən qadağaların tətbiq edilməsi və mənəvi zərərin kompensasiya edilməsi barədə mülki qaydada məhkəməyə müraciət etmək hüququna da malikdirlər".
Ətraflı Baku TV-nin süjetində:
