Qadın voleybolçulardan ibarət Azərbaycan millisi Avropa çempionatının C qrupunda növbəti matçına çıxacaq.
Oxu.Az xəbər verir ki, baş məşqçi Faiq Qarayevin rəhbərlik etdiyi komandamız bu dəfə Rumıniya yığması ilə qüvvəsini sınayacaq.
Bu qarşılaşmaya saat 18:30-da Milli Gimnastika Arenasında start veriləcək.
Eyni qrup çərçivəsində günün digər maraqlı duelində isə saat 15:30-da Niderland və Portuqaliya yığmaları meydanda münasibətlərinə aydınlıq gətirəcəklər.
Qeyd edək ki, paytaxt Bakı avqustun 28-nə qədər C qrupunun gərgin oyunlarına ev sahibliyi edəcək. Geridə qalan iki turdan sonra Azərbaycan millisi 6 xal toplayaraq qrupda inamla liderlik edir. Onun ən yaxın izləyicisi 5 xalla Belçikadır, Niderland isə 2 xalla üçüncü pillədə qərarlaşıb. Hərəyə 1 xalı olan Rumıniya və İspaniya 4-5-ci yerləri bölüşür, xalsız Portuqaliya isə altıncı olaraq sonuncu pillədədir.
Mövcud reqlamentə əsasən, qrup mərhələsini ilk dördlükdə başa vuran komandalar Avropa çempionatının həlledici pley-off mərhələsinə vəsiqəni təmin edəcəklər.
