Premyer Liqa: "Araz-Naxçıvan" "Sabah"a məğlub oldu

Misli Premyer Liqasında "Araz-Naxçıvan" "Sabah"a məğlub olub.

Oxu.Az xəbər verir ki, XVII turun oyununda bölgə təmsilçisi 0:1 hesabı ilə uduzub.

"Bayquşlar"ın heyətində yeganə qolu 78-ci dəqiqədə Coy Lens Mikels vurub.

Bu nəticənin ardından xallarının sayını 26-ya çatdıran "Sabah" turnir cədvəlində dördüncü sıraya yüksəlib. "Araz-Naxçıvan" isə 39 xalla liderdir.

Qeyd edək ki, turun açılış oyununda "Şamaxı" və "Səbail" kollektivləri qolsuz bərabərə qalıblar.

16:29

Azərbaycan Premyer Liqasında XVII tura start verilib.

Oxu.Az xəbər verir ki, ilk oyun günündə "Şamaxı" doğma meydanda "Səbail"lə qarşılaşıb.

Şamaxı stadionunda meydançanın qardan təmizlənməsi üzündən startı 20 dəqiqə gecikən matçda hesab açılmayıb.

Qolsuz bərabərlikdən sonra "Şamaxı" turnir cədvəlində 14 xalla yeddinci, "Səbail" isə 9 xalla sonuncu - onuncu yerdə qalıb.

Qeyd edək ki, günün digər görüşündə "Araz-Naxçıvan" klubu "Sabah"ı qəbul edəcək.

13:51

Azərbaycan Premyer Liqasının XVII turunda bu gün keçirilməli olan "Şamaxı" - "Səbail" oyunu nəzərdə tutulan vaxtdan gec başlayacaq.

Bölgə təmsilçisinin mətbuat xidmətindən "Report"a verilən məlumata görə, buna Şamaxı stadionunda meydançanın qardan təmizlənməsi səbəb olub.

Hazırda meydançada təmizləmə işləri aparıldığından qarşılaşmanın start fiti saat 14:20-da çalınacaq.

Qeyd edək ki, daha əvvəl görüşün başlama vaxtı saat 14:00-a təyin olunmuşdu.

08:30

Bu gün Azərbaycan Premyer Liqasında XVII tura iki oyunla start veriləcək.

Oxu.Az xəbər verir ki, ilk oyun günündə "Şamaxı" "Səbail"i saat 14:00-da, "Araz-Naxçıvan" isə "Sabah"ı saat 16:30-da qəbul edəcək.

İkinci oyun günündə "Zirə" "Turan Tovuz"la, "Neftçi" isə "Kəpəz"lə dekabr ayının 15-də üz-üzə gələcək. Tura "Qarabağ" - "Sumqayıt" görüşü ilə yekun vurulacaq. Qarşılaşma saat 19:00-da start götürəcək.

Qeyd edək ki, hazırda aktivində 39 xalı olan "Araz-Naxçıvan" turnir cədvəlinin lideridir. Bir oyun az keçirən "Qarabağ" 38 xalla ikinci pillədə qərarlaşıb. İlk üçlüyü 30 xalla "Turan Tovuz" qapayır. "Zirə" 26 xalla dördüncü, "Sabah" isə 23 xalla beşincidir. Altıncı sıradakı "Sumqayıt"ın 19 xalı var. Hərəyə 13 xalı olan "Şamaxı" ilə "Neftçi" yeddinci-səkkizinci pillələri bölüşürlər. "Kəpəz" 10 xalla doqquzuncu, "Səbail" isə 9 xalla sonuncudur.