Azərbaycan Premyer Liqasında qış transfer pəncərəsi nə zaman açılacaq?

Azərbaycan Premyer Liqasında 2024/25 mövsümünün qış transfer pəncərəsinə yanvar ayının 14-də start veriləcək, fevralın 10-da isə başa çatacaq.

Bu barədə Oxu.Az-a açıqlamasında Peşəkar Futbol Liqasının Texniki-İdman direktoru Elgiz Abbasov bildirib.

"Qış transfer pəncərəsi yanvarın 14-də açılacaq. Klublar 10 fevraladək yeni oyunçuların qeydiyyatını həyata keçirə biləcəklər. Rəsmi transfer dövrü xaricində klublar azad agent statusuna malik oyunçuları (ancaq transfer dövrü bitəndən sonra adı protokola salınmayan oyunçuları) martın 31-dək qeydiyyatdan keçirib sifariş edə bilərlər.

Klublar aşağı yaş liqalarında çıxış edən futbolçusunu oyunçu pasportunu və lazım olan digər sənədləri təqdim etməklə mövsüm boyu sifariş edə bilərlər. Başqa klubdan keçid həyata keçirilibsə, sifariş olunacaq gənc futbolçunun cari kluba son qeydiyyat tarixi cari transfer dövrünü keçməməlidir. Klublar transfer fəaliyyəti zamanı bu məqamları nəzərə almalıdırlar.

Ümumən, bütün transferlər AFFA-nın Oyunçuların Statusu və Transferi Komitəsinin Əsasnaməsinə uyğun olaraq aparılır. Eyni zamanda, klublara və mediaya paylanan, Peşəkar Futbol Liqasının rəsmi saytında dərc olunan mövsümlük əsasnamələrimizdə tələblərlə bağlı ətraflı məlumat yerləşdirilib. Klubların hər hansı biri ilə bağlı transfer qadağası yoxdur. Legioner futbolçu limitinin doldurulmasına gəlincə, bizdə legionerlərə start heyətində limit tətbiq olunur, sifarişlə bağlı hər hansı limit nəzərdə tutulmayıb. Sadəcə, saya uyğun olaraq ödəniləcək rüsum dəyişir".

Anar Həsənov