Azərbaycanın sərbəst güləş millisinin, yunan-Roma güləşi üzrə yığmanın baş məşqçiləri və qadın güləşi üzrə yığmanın baş məşqçi əvəzi güləş yığmalarımızın ilin son mötəbər yarışına hazırlığı dəyərləndiriblər.
Oxu.Az xəbər verir ki, məşqçilər bu barədə Güləş Federasiyasına açıqlama veriblər.
Sərbəst güləş üzrə baş məşqçi Xetaq Qazyumov bildirib ki, Azərbaycan güləşçilərinin bu yarışda əsas rəqibi İran millisinin idmançıları olacaqlar:
"Hazırlıq plan üzrə gedir. Dünya çempionatından sonra iki təlim-məşq toplanışı keçdik. Fiziki hazırlığı toplanışının ardınca taktiki-texniki çalışmalara üstünlük verdik. Yoxlama görüşləri keçirdik. Milli üzvlərinin hazırlıq səviyyəsini nəzərdən keçirdik. Allaha şükürlər olsun ki, zədəli güləşçilərimiz yoxdur. Ümid edirik ki, azarkeşlərin etimadını doğruldacağıq. Təbii ki, idmançı il boyu pik səviyyədə ola bilməz. Ancaq İslam Oyunları böyük yarışdır. Bu baxımdan xüsusi motivasiyaya ehtiyac yoxdur. İdmançılar dincəlib və bərpa prosesi keçiblər. Eşitdiyimə görə, orada indi çox istidir. Deməli, biz həm də hava şəraiti ilə də mübarizə aparmalıyıq. Sözsüz ki, əsas rəqib İran güləşçiləridir. Legionerlərdən təşkil edilmiş Bəhreyn və Albaniya komandalarını, həmçinin Türkiyə millisini də ciddi rəqib görürük. Rəqibləri fərdi qaydada təhlil edirik. Ümid edirik ki, hər şey yaxşı olacaq".
Yunan-Roma güləşi üzrə baş məşqçi Aleksandr Tarakanov da əsas rəqibləri kimi İranı qeyd edib:
"Dünya çempionatından sonra komandaya istirahət verildi. Bu müddət ərzində zədəsi olanlar bərpa prosesi keçdilər. Daha sonra ümumi fiziki hazırlıq prosesi baş tutdu. Noyabrın 1-də isə iki həftəlik taktiki-texniki çalışmalara başladıq. Milli üzvləri il boyu təlim-məşq proseslərində iştirak etdikləri üçün hazırlıq səviyyəsi ilə bağlı problem yoxdur. Düzdür, ilin sonu olduğu üçün yorğunluq var. Ona görə də artıq yüngül və qısamüddətli məşqlərə keçmişik ki, yüklənmə olmasın. Bu yarışda əsas rəqibimiz İran güləşçiləri olacaqlar. Onlar əsas heyətlə iştirak edəcəklər. Özbəkistan, Qırğızıstan, Qazaxıstan və Türkiyə güləşçilərini də bu siyahıya əlavə etmək olar. Fikrimcə, İslamiadada bizi ciddi rəqabət gözləyir. Sözsüz ki, bütün rəqibləri keçirdikləri görüşlərin görüntülərinə baxaraq təhlil edirik. Səhvlərin üzərində işləyirik. Əlbəttə, rəqiblər də bizi təhlil edir və bizə qarşı xüsusi köklənirlər. Ona görə də maksimum hazırlıqlı olmalıyıq".
Qadın güləşi üzrə baş məşqçi əvəzi Toğrul Əsgərov isə vurğulayıb ki, hədəfimiz ən azı bir dəst medal qazanmaqdır:
"İslam Oyunlarına hazırlığı başa vururuq. Əvvəlcə fiziki, daha sonra isə taktiki-texniki hazırlıq üzrə məşqlər keçdik. Toplanış Göygöldə baş tutdu. Hədəfimiz ən azı bir dəst medal qazanmaqdır. Bütün güləşçilərimizin medala sahib çıxmasını arzulayıram. İdman sürprizlərlə doludur. Hər şey ola bilər. Favorit sayılmayan idmançı çempion ola və ya iddialı güləşçi medalsız qala bilər. Türkiyə, Qazaxıstan, Özbəkistan və Qırğızıstan komandaları əsas rəqiblərdir. Nigeriya da bir neçə çəkidə yaxşı güləşçilərə sahibdir. Məşqçilər heyəti olaraq milli üzvlərinin maksimal hazırlıq səviyyəsinə çatmaları üçün əlimizdən gələni etmişik".
Xatırladaq ki, VI İslam Həmrəyliyi Oyunlarında güləş yarışları noyabrın 18-dən 21-dək keçiriləcək.
