Azərbaycan cüdoçuları "Böyük Dəbilqə" turnirinin ikinci günündə 3 medal qazanıblar

Azərbaycan cüdoçuları Bakıda keçirilən "Böyük Dəbilqə" turnirinin ikinci günündə 3 medal qazanıblar.

Oxu.Az xəbər verir ki, bu barədə Cüdo Federasiyası məlumat yayıb.

Bu gün 4 çəki dərəcəsində 11 idmançımız tatamiyə çıxıb.

Kişilərdə Rəşid Məmmədəliyev (73 kq) zədə səbəbindən Tatsuki İşihara (Yaponiya) ilə final görüşünə çıxa bilməyib və gümüş medalla kifayətlənib. Bu çəkidə Vüsal Qələndərzadə üçüncü yer uğrunda görüşdə Ryuqa Tanakanı (Yaponiya) məğlub edərək bürünc medala yiyələnib.

81 kq çəki dərəcəsində Zelim Tçkayev finalda Fransua Qotye-Drapoya (Kanada) qalib gələrək millinin hesabına ilk qızıl medalı yazdırıb. Bu çəkidə Ömər Rəcəbli bürünc medal uğrunda qarşılaşmada Askerbiy Qerbekova (Bəhreyn) uduzub.

Qeyd edək ki, Azərbaycan cüdoçuları yarışın ilk günündə iki bürünc medal qazanıb. Əhməd Yusifov (60 kq) və Elşən Əsədov (66 kq) 3-cü yeri tutub.

16:55

Bakıda təşkil olunan "Böyük Dəbilqə" turnirinin ikinci günündə Azərbaycanın dörd cüdoçusu finala yüksəlib.

Oxu.Az xəbər verir ki, bu barədə Cüdo Federasiyası məlumat yayıb.

Bildirilib ki, 73 kiloqram çəkidə yarışan Rəşid Məmmədəliyev finalda yaponiyalı cüdoçu Tatsuki İşihara ilə üz-üzə gələcək.

Eyni çəkidə mübarizə aparan Vüsal Qələndərzadə isə bürünc medal uğrunda digər Yaponiya idmançısı Ryuqa Tanaka ilə qarşılaşacaq.

Zelim Tçkayev (81 kiloqram) qızıl medal uğrunda Kanadanı təmsil edən Fransua Qotye Drapö ilə gücünü sınayacaq. Bu çəkidə digər cüdoçumuz Ömər Rəcəbli üçüncü yer üçün bəhreynli Askerbyi Qerbekovla tatamiyə çıxacaq.

Qeyd edək ki, final qarşılaşmaları saat 17:00-da başlayacaq.