Azərbaycanlı gimnast 20 yaşında peşəkar karyerasını bitirdi

Azərbaycanlı gimnast Arzu Cəlilova peşəkar idmandan getdiyini açıqlayıb.

Oxu.Az xəbər verir ki, gənclər arasında dünya çempionatının ikiqat mükafatçısı karyerasını başa vurmasından danışıb.

O, sosial şəbəkə hesabında belə yazıb: "Bu sondur... və yeni başlanğıcdır. Belə post yazacağımı heç vaxt düşünməmişdim. Uzun illər həyatımın bir parçası ilə vidalaşmaq üçün söz tapmalı olacağım ağlımdan belə keçmirdi".

Cəlilova hər şeyin 2022-ci ildə dəyişdiyini vurğulayıb:

"Zədə ikiillik ağrılara, əməliyyatlara və qoltuq ağaclarına səbəb oldu. Günlər həftələrə, həftələr aylara, aylar isə illərə çevrildi. Geri qayıtmaq üçün mübarizə apardım. 2023-cü ildə qayıtmağa çalışdım, amma bədənim hazır deyildi. Sonra 2024-cü ildə yenidən cəhd etdim. Bir anlıq həqiqətən inandım ki, bu dəfə biz bunu bacardıq. Bu dəfə qalib gəldim. Ancaq bəzən nə qədər güclü olsanız da, bəzi şeylər sizin nəzarətinizdən kənarda olur. İndi isə bütün bunlardan sonra ən çətin qərarı verməliyəm - gimnastikadan rəsmən ayrılıram".

O, idmançı karyerasının bu şəkildə bitməsini istəmədiyini deyib:

"Amma bilirəm ki, idmana hər şeyimi vermişəm. Heç nəyə peşman deyiləm. Hər an, hər yıxılma, hər qələbə üçün minnətdaram. İlk məşqçimdən sonuncuya kimi məni bu yolda yönləndirən hər kəsə minnətdaram. Siz hamınız məni bu gün olduğum kimi formalaşdırdınız.

Gimnastika həmişə mənim bir hissəm olacaq. O məni bir insan kimi formalaşdırıb. Həyatımın bu fəsli bitmək üzrə olsa da, bilirəm ki, məni qarşıda yeniliklər gözləyir".