Elbrus Rzayev: "Alfonso və Murad Olimpiya çempionu olacaq və Azərbaycan boksunda tarix yazacaqlar"

"Murad bu gün bütün əzmkarlığını ortaya qoyaraq qalib gəlmək üçün əlindən gələni etməli və yarımfinala yüksəlməlidir".

Bunu Oxu.Az-a açıqlamasında gənclərdən ibarət Azərbaycan boks millisinin baş məşqçisi Elbrus Rzayev deyib.

"Yarımfinalda Alfonsonun rəqibi ispaniyalı boksçu olacaq. Hər iki boksçu bir-birini çox yaxşı tanıyır. Hər ikisinin döyüş taktikası eynidir. Amma əminəm ki, Alfonso finala yüksələcək. Çünki ustalıq səviyyəsi baxımından rəqibindən üstündür. Finalda da qalib gəlib Olimpiya çempionu olacaq və Azərbaycan boksunda tarix yazacaq.

Murad Allahverdiyev də bu gün Qazaxıstan boksçusu ilə döyüşəcək. Həmin boksçunun digər qardaşını Alfonso məğlub edərək növbəti mərhələyə yüksəlmişdi. Döyüş çox gərgin keçəcək. Rəqib çox döyüşkən və təcrübəli olduğundan Muradı çətin döyüş gözləyir. Amma bizim istəyimiz boksçumuzun qalib gəlməsi və növbəti mərhələyə yüksəlməsidir. Murad bu gün bütün əzmkarlığını ortaya qoyaraq qalib gəlmək üçün əlindən gələni etməli və yarımfinala yüksəlməlidir.

Hər iki boksçumuza uğurlar arzulayıram".

Xatırladaq ki, Alfonso Dominqes yarımfinala yüksələrək ən azı bürünc medalı təmin edib, Murad Allahverdiyev isə bu gün eyni uğuru 1/4 finalda təkrarlamağa çalışacaq.

Anar Həsənov