Emin Mahmudov Kazbek Tuayevə çatıb

33 yaşlı yarımmüdafiəçi Emin Mahmudov "Neftçi" klubunda 60-cı qolunu vuraraq Kazbek Tuayevin göstəricisini təkrarlayıb.

Oxu.Az xəbər verir ki, Emin Mahmudovun yubileyi Misli Premyer Liqasının XXXIII turuna təsadüf edib. O, "Kəpəz"lə görüşdə (2:2) Bakı klubunu məğlubiyyətdən xilas edən qolun müəllifi olub.

Emin "Neftçi"də keçirdiyi 252-ci qarşılaşmada 60-cı qoluna sevinib. O, Premyer Liqada 44, Azərbaycan Kubokunda 7, avrokuboklarda 9 dəfə fərqlənib.

Mahmudov "Neftçi"nin tarixi ərzində 60 və daha çox qol vuran 15-ci futbolçudur. O, klub tarixinin bombardirləri siyahısında 60 qol vuran Kazbek Tuayevə çatıb.

Qeyd edək ki, "Neftçi" tarixinin ən məhsuldar futbolçusu Samir Ələkbərovdur - 142 qol. Anatoli Banişevski 136, Yunis Hüseynov 103 dəfə fərqləniblər.