Beynəlxalq Futbol Federasiyasının (FIFA) keçmiş prezidenti Yozef Blatter qurumun rəhbəri postuna - Canni İnfantinonun yerinə Norveç nümayəndəsi Liza Klavenessin namizədliyini təklif edib.
Oxu.Az-ın xəbərinə görə, o, bu barədə öz sosial şəbəkə hesablarında paylaşım edib.
"Liza Klaveness ən yüksək hörmətə layiqdir. O, yeganə insandır ki, həmişə aydın mövqe tutub və axın istiqamətində getməyib. FIFA üçün vaxt çatıb ki, təşkilata qadın rəhbərlik etsin", - deyə Yozef Blatter yazıb.
45 yaşlı Liza Klaveness Norveç milli komandasının keçmiş futbolçusudur. 2022-ci ildə o, Norveç Futbol Assosiasiyasının (NFF) prezidenti seçilib.
Canni İnfantino korrupsiya qalmaqalları səbəbindən istefa verən Blatteri əvəzləyərək, 2016-cı ilin fevral ayından bəri FIFA-ya rəhbərlik edir. FIFA-nın növbəti prezidentinin seçkiləri 2027-ci ilin mart ayına təyin edilib və Mərakeşdə keçiriləcək.
