İsrailin xarici işlər naziri İsrael Katz Fransada Olimpiya Oyunlarının açılış günündə sürət qatarlarının elektrik şəbəkəsinin yandırılmasına görə məsuliyyəti İranın "şər oxu"nun təsirinə həvalə edib.
Oxu.Az-ın TASS-a istinadən verdiyi məlumata görə, o, müvafiq bəyanatı "X" hesabında dərc edib.
"Olimpiada ərəfəsində Fransada dəmir yolu infrastrukturunun təxribatı İranın və radikal İslamın şər oxunun təsiri altında planlaşdırılıb və həyata keçirilib", - deyə İsrail XİN rəhbəri bildirib.
Yeri gəlmişkən BFMTV telekanalı məlumat yayıb ki, Fransa hakimiyyəti Olimpiya Oyunlarının təntənəli açılışı günü yüksək sürətli qatarların (TGV) fəaliyyətinə təsir göstərən təxribat aktları ilə əlaqədar təcili iclas çağırıb. Fransa hökumətinin nümayəndələri baş verənləri təxribat aktı kimi xarakterizə edərək, vəziyyətin ciddiliyini və nəqliyyat sisteminin normal fəaliyyətinin bərpası üçün təcili tədbirlərin görülməsinin vacibliyini vurğulayıblar.
Hazırda Fransada sürət qatarlarının hərəkətinin bərpası yönündə işlər gedir. Hüquq-mühafizə orqanları cinayətkarların axtarışına başlayıb. Prioritet versiya yanğınların arxasında "ultra sol radikallar"ın ola biləcəyidir.
Fransanın yüksəksürətli dəmiryol şəbəkəsi (TGV), Paris Olimpiya Oyunlarının açılış mərasimindən bir neçə saat əvvəl yanğınlar da daxil olmaqla, nəqliyyat sisteminin işini pozan təxribatlara məruz qalıb.
Oxu.Az-ın focus.ua-ya istinadən verdiyi məlumata görə, bu barədə milli dəmir yolu operatoru SNCF məlumat verib.
Mənbənin məlumatına görə, hücumlar onun Atlantik, şimal və şərq xətlərinə təsir edib.
"TGV şəbəkəsini iflic etməyə yönəlmiş genişmiqyaslı hücuma görə bir çox marşrutlar ləğv edilməli olacaq", - deyə məlumatda vurğulanıb.
Təmir işlərinin həftənin sonuna qədər davam edəcəyi gözlənilir.
Agentliyin məlumatına görə, hücumlar nəticəsində təxminən 800 000 sərnişin zərər çəkib.
SNCF sərnişinlərdən səfərlərini təxirə salmağı və dəmiryol stansiyalarına getməməyi xahiş edib.
Qeyd edək ki, vandalizm aktları Parisin 7 500 idmançı, 300 000 tamaşaçı və çoxsaylı VIP şəxsin iştirak edəcəyi açılış mərasiminə hazırlaşdığı bir vaxtda baş verib.
Rəylər