Gədəbəy rayonunda mərkəzi stadionu şumlayıblar.
Oxu.Az xəbər verir ki, bu barədə Gədəbəydən olan idman jurnalisti Anar Şabanoğlu məlumat yayıb.
O bildirilib ki, uşaqlığı bu stadionda keçib:
"Hava qaranlıqlaşana, göz topu görməyənə kimi futbol oynayırdıq. Yəqin görüblər ki, futbolçu yetişdirə bilmirlər, fikirləşiblər ki, bəlkə kartof yetişə".
O xatırladıb ki, vaxtilə oyunlarını bu stadionda keçirən Gədəbəyin "Narzan" klubu Azərbaycan çempionatının I Liqasında çıxış edib:
"Bu stadionda bir çox tanınmış futbolçular, o cümlədən Zaur Tağızadə OİK-in heyətində qol vurmuşdu.
Şəhərin ən azı 2-3, kəndlərin hərəsinin ən azı bir komandası olurdu. Rayon çempionatı keçirilirdi.
Sonra dedilər Fazil Məmmədov (keçmiş vergilər naziri) stadionu alıb. Stadionu bağladılar, heç kimi buraxmadılar.
Nəhayət, deyəsən "təyinatı üzrə" istifadə etməyə başlayıblar.
Amma deyilənə görə, stadionun torpağı özəlləşdirilməyib. Yəni bu edilən özbaşınalıqdır.
Sonra deyirik ki, ölkədə niyə futbol yoxdur..."
