İbrahimoviç: Mən dünyanı zəbt etmişəm, növbə İsveçindir

İsveç millisinin sabiq üzvü Zlatan İbrahimoviç skandinaviyalıların dünya çempionatındakı uğurlu çıxışına münasibət bildirib. 

Oxu.Az xəbər verir ki, 36 yaşlı futbolçu İsveç yığmasının mundialda daha da irəli gedə biləcəyini istisna etməyib. 

“Hələ dünya çempionatının startından öncə demişdim ki, onlar çox irəli gedəcəklər. Hətta kuboku da qazana bilərlər. Çox sevinirəm. İsveçli olduğuma görə qürur duyuram. Qələbəni qeyd etmək üçün İsveç bayrağı ilə gəzirdim.

Mən bütün dünyanı zəbt etmişəm, indi isə İsveçin növbəsidir. Onlar da dünyanı ələ keçirmək üzrədirlər. Kim olursa olsun, İsveçin rəqiblərini çətin matç gözləyir. Məncə, hamı bunu yaxşı başa düşür. Onlar bunu göstərdilər və eyni ruhla da davam edirlər”, – deyə o bildirib.

İbrahimoviç digər qitə təmsilçiləri ilə müqayisədə Avropa zonası üzrə çıxış edən yığma komandaların İsveç üçün daha çətin rəqib olduqlarını qeyd edib: 

“İsveçrə ilə matç çətin olacaq, çünki bu, Avropa qarşıdurmasıdır. İsveç Avropanı təmsil etməyən iki yığmaya qalib gəlsə də, Almaniyaya məğlub oldu. Ancaq bunun bir məna ifadə etdiyinə inanmıram. Onların hər şeyin ən doğrusunu edəcəyindən əminəm. Bizə isə komandanı dəstəkləmək qalır”.

Qeyd edək ki, İsveç iyulun 3-də 1/8 final çərçivəsində İsveçrə ilə qarşılaşacaq. Görüş Bakı vaxtı ilə saat 18:00-da başlayacaq.

S.M.
www.oxu.az