Portuqaliyalı mütəxəssis Joze Mourinyo yeni mövsümdən etibarən yenidən İspaniyanın "Real" futbol klubunun baş məşqçisi ola bilər.
Oxu.Az xəbər verir ki, bu barədə AS nəşri məlumat yayıb.
Mənbənin məlumatına görə, hazırda Portuqaliyanın "Benfika" klubunu çalışdıran Joze Mourinyo bu posta əsas və yeganə namizəd hesab olunur. Klub rəhbərliyi düşünür ki, komandada nəzarətdən çıxmış atmosferi yalnız təcrübəli portuqaliyalı mütəxəssis sabitləşdirə bilər.
Hazırda tərəflər arasında rəsmi müqavilə imzalanmasa da, həm "Real", həm də Mourinyo qarşılıqlı maraqdan xəbərdardır. Məlumata görə, müqavilənin rəsmiləşdirilməsi yalnız zaman məsələsidir.
Bildirilir ki, "Benfika"nın prezidenti Rui Koşta artıq yeni baş məşqçi axtarışına başlayıb. Mourinyonun müqaviləsində nəzərdə tutulan 3 milyon avroluq təzminat məbləği isə Madrid klubu üçün məqbul hesab edilir.
63 yaşlı Joze Mourinyo 2010-2013-cü illərdə "Real"a rəhbərlik edib. Onun rəhbərliyi altında Madrid təmsilçisi bir dəfə İspaniya çempionu olub, həmçinin ölkə kuboku və superkubokunu qazanıb.
Portuqaliyalı məşqçi 2025-ci ilin sentyabrından "Benfika"nı çalışdırır. O, karyerası ərzində Portuqaliyanın "Leyriya" və "Portu", İngiltərənin "Çelsi", "Mançester Yunayted" və "Tottenhem", İtaliyanın "İnter" və "Roma", həmçinin Türkiyənin "Fənərbağça" klublarında fəaliyyət göstərib.
Joze Mourinyo UEFA Çempionlar Liqasını iki fərqli klubla qazanan altı məşqçidən biridir. UEFA onu 2017-ci ildə 1954-cü ildən bəri Avropanın ən böyük 10 məşqçisindən biri siyahısına daxil edib.
