Bu həftə baş tutan oyunların uğurlu nəticələrinə baxmayaraq, Azərbaycanın UEFA əmsallar cədvəlində mövqeyi dəyişməyib.
Oxu.Az xəbər verir ki, son beş mövsümün ümumi göstəricilərinin cəm olunduğu reytinq siyahısında ölkəmiz hazırda 21.687 xal toplayaraq iki klubla mübarizəni davam etdirməklə 26-cı pillədə mövqeyini qoruyur.
Siyahıda Azərbaycanın ən yaxın qonşularından olan Sloveniya 22.718 xalla 25-ci yeri tutur, 27-ci pillədə qərarlaşan Bolqarıstanın hesabında isə 20.437 xal var - hər iki ölkə avrokuboklarda yalnız bir klubla çıxışını davam etdirir.
Hazırda UEFA-nın əmsallar cədvəlinin zirvəsində 101.852 xalla İngiltərə dominantlıq edir.
Xatırladaq ki, bu həftə baş tutan qarşılaşmalarda Çempionlar Liqasında ölkəmizi təmsil edən "Sabah" Bakıda Danimarkanın "Orhus" komandasını darmadağın edib (4:0), Konfrans Liqasında isə "Qarabağ" Ukraynanın "Dinamo Kiyev" klubundan güclü olub (2:0). Beləliklə, hər iki təmsilçimiz pley-off mərhələsinə adlayıb.
Əmsallar cədvəlində ölkəmiz bu il 3.125 xal toplayıb və yalnız Latviyadan (3.250) geri qalır. Ölkəmizin aktivinə "Sabah" 1.250 xal, "Qarabağ" 1.000 xal, "Zirə" 0.625 xal və "Neftçi" 0.250 xal töhfə veriblər.
