Legioner limiti və komanda sayı ilə bağlı qərarlar futbolumuzu ağ günə çıxaracaq?

Azərbaycan Futbol Federasiyaları Assosiasiyası (AFFA) İcraiyyə Komitəsində futbolun inkişafı üçün üç vacib qərar qəbul edilib. Bunlar yeni baş katibin təyinatı, klub sayının artırılması və legioner futbolçu limitinin ləğvi ilə bağlı olub.

Belə ki, yeni mövsümdən etibarən Azərbaycan Premyer Liqasında 12 komanda mübarizə aparacaq, legioner limiti isə tamamilə ləğv olunacaq.

Yeni mövsümdən legioner limitində aşağıdakı kriteriyalar tətbiq olunacaq:

1. Oyunun sifariş vərəqəsində maksimum 17 əcnəbi futbolçu ola bilər.

2. Meydanda eyni anda 11 əcnəbi futbolçu oynaya bilər.

3. Legioner futbolçular üçün rüsum aşağıdakı kimi olacaq:

- 1 legionerdən 7 legionerə qədər: 5 000 AZN

- 8-dən 12-yə qədər: 10 000 AZN

- 13-dən 15-ə qədər: 100 000 AZN

- 16 və daha yuxarı: 200 000 AZN

4. Öz ölkəsinin milli komandasının üzvü olub-olmamasından asılı olmayaraq, bütün legionerlərə rüsum tətbiq ediləcək.

5. Heyətində yerli futbolçular oynadan klublara xüsusi hesablama metodu ilə bonus ödəniləcək. Bonuslar legioner rüsumundan əldə ediləcək vəsaitdən veriləcək.

Bu mövzu ilə bağlı Oxu.Az-a açıqlama verən futbol mütəxəssisi Anar Xanlarov bildirib ki, legioner limitinin ləğvi Azərbaycan futbolu üçün yeni inkişaf strategiyası ola bilər.

"Komanda sayının artırılması çox yaxşı oldu. AFFA-nın yeni rəhbərliyi ilk gündən bunu demişdi və müsbət haldır ki, sözlərinə əməl etdilər. Çünki bütün futbol ictimaiyyəti illərdir bu məsələnin vacibliyini önə çəkir. Düşünürəm ki, gələcəkdə tədricən bu sayı 14-ə, 16-a çatdırmaq lazımdır. Böyük ehtimalla, gələn komandalar bölgə təmsilçiləri olacaq ki, bunun özü də futbolun kütləviliyi və azarkeş amili baxımından vacib məqamdır. Legioner limitinin götürülməsinə gəlincə, bu qərarı da dəstəkləyirəm. Buna qarşı olanlar da çoxdur və düşünürlər ki, bu qərar yerli futbolçuların inkişafına, milli komandaya mənfi təsir edəcək, amma belə düşünmürəm. Biz başa düşməliyik ki, məcbur şəkildə, limitin hesabına hansısa yerli futbolçunu meydana buraxmaqla onun inkişafına kömək etmiş olmuruq. Əksinə, o futbolçuda arxayınlıq yaranır, öz üzərində işləmir, qabağa getmir, inkişaf etmir. Limitə görə məcbur oynadılan həmin yerli futbolçulardan formalaşan milli komandanın da hansı durumda olduğunu hamı görür. İllərdir limit qoyduq, heç nə dəyişmədi. 1-2 il də limitsiz oynayaq, bəlkə faydası oldu. Onsuz 12 komandanı hamısı legioner oynadan deyil, yerli futbolçulara istənilən halda tələbat olacaq. Amma həmin yerlilər limitin hesabına yox, öz bacarıqları hesabına oynayacaq, rəqabət yaranacaq və inkişaf olacaq. Burada qane olmayanlar özlərini ölkə xaricində sübut etməyə can atacaq", - deyə A.Xanlarov bildirib.

Digər futbol mütəxəssisi Kənan Məstəliyev isə Oxu.Az-a açıqlamasında legioner limiti ilə bağlı həmkarının fikirlərinin tam əksini deyib.

"Legioner limitinin ləğv olunmasına qarşı idim. Bu, yerli futbolçuların milliyə dəvət olunmasına və karyeralarına ciddi təsir edəcək. Şərtlər sərtləşdirilib. 17 legioner və ya 16 legionerdən sonra tələb olunan məbləğ, digər məsələlər bu mənfi halları yenə də aradan qaldırmır. Bu qərar yerli futbolçuların qarşısını ciddi şəkildə kəsəcək. Biz əslində akademiyalar qurub, futbolçu yetişdirməli, daha sonra legioner limitini ləğv etməli idik.

Strategiya məsələsinə gəldikdə isə, qəbul olunan qərarların 40%-i yerinə yetirilərsə, Azərbaycan futbolunun gələcəyi çox yaxşı ola bilər. Əsas məsələ yazılanları yerinə yetirə bilməkdir.

Klub sayının artırılması çox yaxşı addımdır. Sayın 12-yə yüksəldilməsini keçid dövrü adlandırmaq olar. Sadəcə bir məqam var ki, bu mövsüm idman prinsipləri mütləq qorunmalıdır. Əgər autsayder komanda aşağı düşməyəcəksə, bu mövsüm keçirilən çempionat oyunları boşuna olacaq".

Anar Həsənov