"Monako"nun baş məşqçisi Adi Hütter hesab edir ki, komandada futbolçular həddinən artıq çoxdur və bu, heyətin idarə edilməsində həm üstünlükdür, həm də çətinliklər yaradır.
Bu barədə Oxu.Az klubun rəsmi saytına istinadən xəbər verir.
"Hazırda heyət çox böyükdür. "Havr"la oyundan sonra dedim ki, heyətə daxil edilməyən futbolçuların işə münasibəti məni çox heyran edir və onları ürəkdən təbrik etmək istəyirəm. Onlar əsl peşəkardırlar. Sevinirəm, soyunub-geyinmə otağında heç vaxt hay-küy salmırlar", - deyən baş məşqçiyə görə, transfer pəncərəsi hələ də açıq olduğundan, klubda hər kəs üçün həll yolları tapmağa çalışırlar.
"Çempionlar Liqası başlayanda mütləq heyətdə rotasiya edəcəyik. Düşünürəm ki, ötən mövsüm bunun üçün əla iş gördük. Hər bir oyunçu hazır olmalıdır, çünki hər kəsin oyun vaxtı olacaq və bizim müxtəlif vəziyyətlərdə hər kəsə ehtiyacımız yaranacaq. Futbolçularıma arxayınam.
Monako ilə müqavilə imzalayanda başa düşürsən ki, hər mövqedə rəqabət var, komandada yer uğrunda daxili mübarizə var. Düşünürəm ki, ötən mövsüm hər bir oyunçunun mənim üçün çox vacib olduğunu sizə göstərmişəm. Kapitanlarımız? Hazırda beş kapitanımız var: Denis Zakaria, Tilo Kerer, Erik Dayer, Pol Poqba və Lukaş Hradetski", - deyə Adi Hütter bildirib.
