Azərbaycanın gənclər və idman naziri Azad Rəhimov Bakıda Olimpiya Oyunları 2024-ün keçirilməsinə müraciətin təqdim olunması imkanlarını qiymətləndirib.
Oxu.Az xəbər verir ki, bu barədə AP agentliyi məlumat yayıb.
“Biz artıq iki dəfə Olimpiadanın Bakıda keçirilməsi hüququ uğrunda mübarizə aparmışıq, lakin bizim 2016 və 2020-ci ilin oyunlarına müraciətlərimiz məğlubiyyətə məruz qalıb. Beynəlxalq Olimpiya Komitəsi (BOK) namizədlərə olduqca sərt tələblər irəli sürür. Əgər həmin tələblər yüngülləşdirilsə, Bakı 2024-cü ilin oyunlarının keçirilməsinə müraciət etmək imkanlarını nəzərdən keçirə bilər. Əks halda, bizə hökumətdən olduqca iri həcmli investisiyalar lazım olacaq.
Məsələn, Bakıda stadion hazırda 68 min tamaşaçı tutur, lakin BOK-un tələbi isə minimum 80 mindir. Bununla belə hamıya Pekinin nümunəsi məlumdur. Orada “Quş yuvası” arenası demək olar ki, istifadə olunmur”, - Azad Rəhimov deyib.
Qeyd edək ki, Olimpiada-2024-ün keçirilməsinə müraciətin təqdim olunması vaxtı 2015-ci ilin sentyabrın 15-də başa çatır.
Artıq Roma, Hamburq və Boston müraciət təqdim ediblər. Öncə Budapeşt də oyunların keçirilməsinə namizədliyini irəli sürəcəyini bildirib.
www.oxu.az
