ABŞ milli komandası argentinalı mütəxəssis Maurisio Poçettinonun rəhbərliyi altında tarixinin antirekordunu müəyyən edib.
Oxu.Az xəbər verir ki, bu, İsveçrəyə qarşı yoldaşlıq görüşündə böyük hesablı məğlubiyyətdən (0:4) sonra baş verib.
Oyun ABŞ-nin Neşvill şəhərindəki "Geodis Park" stadionunda keçirilib. Amerikalılar ardıcıl olaraq dördüncü ev oyununda məğlub olublar. Belə hal sonuncu dəfə 1988-ci ildə baş vermişdi.
Bundan əvvəl ABŞ KONKAKAF Millətlər Liqasının yarımfinalında Panamaya 0:1 hesabı ilə uduzub. Daha sonra üçüncü yer uğrunda oyunda Poçettinonun komandası Kanadaya 1:2 hesabı ilə məğlub olub. Son yoldaşlıq görüşündə isə ABŞ Türkiyəyə 1:2 hesabı ilə uduzub.
Qeyd edək ki, ABŞ Kanada və Meksika ilə birlikdə 2026-cı ilin dünya çempionatının ev sahiblərindən biridir.
