"Omoniya"nı çox yaxşı təhlil etmişik".
Oxu.Az xəbər verir ki, bunu "Araz-Naxçıvan"ın futbolçusu Qara Qarayev UEFA Konfrans Liqasının III təsnifat mərhələsində "Omoniya"ya (Kipr) qarşı keçirəcəkləri ilk oyundan öncə mətbuat konfransında deyib.
O, sabahkı qarşılaşmaya ciddi hazırlaşdıqlarını söyləyib.
"Komandada yüksək əhvali-ruhiyyə var. Sabahkı oyuna tam heyətlə hazırıq. Güclü rəqibə qarşı çıxış edəcəyik. Düşünürəm ki, son matçlarda özlərini çox yaxşı göstərirlər. Rəqib barədə təhlillər aparmışıq. "Aris"lə oyunda qazanılan qələbə bizə əlavə motivasiya verdi. Azarkeşlərin dəstəyinə də çox ehtiyacımız var. Növbəti mərhələyə adlamaq üçün bizimlə birgə azarkeşlər də dəstək olaraq əlavə qüvvəyə çevrilə bilərlər. Ümid edirəm ki, tribunalar dolacaq. Bizim üçün hansı komanda ilə qarşılaşacağımız əhəmiyyət kəsb etmir. Bütün rəqiblərə hörmətlə yanaşırıq".
Yarımmüdafiəçi "Qarabağ"da çıxış etdiyi və avrokuboklarda qrup mərhələlərinə vəsiqə qazandıqları illərdən danışıb.
"Qarabağ" komandası da qrup mərhələlərinə çətinliklə gəlib. Yaxşı xatırlayıram ki, hər oyuna xüsusi ciddiyyətlə hazırlaşırdıq. Düşünürəm ki, "Araz-Naxçıvan" da artıq öz gücünü artırır və ümid edirik ki, Liqa mərhələsinə vəsiqə qazanacağıq".
Qeyd edək ki, "Araz-Naxçıvan" - "Omoniya" matçı avqustun 7-də "Dalğa Arena"da, saat 20:00-da start götürəcək. Cavab görüşü bir həftə sonra Nikosiyada təşkil olunacaq.
Anar Həsənov
