Noyabrın 8-i Las Veqasın APEX Arenası yenidən adrenalinin, gərginliyin və MMA sənətinin mərkəzinə çevriləcək. Bu dəfə UFC səhnəsinə parlaq ulduzlar deyil, yeni adlar, yeni nəfəs və yeni hekayələr çıxacaq. Gecənin əsas döyüşü Braziliyanın yüksələn istedadı Qabriel Bonfim ilə təcrübəli yamaykalı Rendi Braun arasında olacaq. Lakin bu, sadəcə bir turnir deyil - bu, növbəti nəsil döyüşçülərin öz adını tarixə yazmaq gecəsidir.
Qabriel Bonfim - cəmi 27 yaşında, Braziliyanın Qoiania şəhərindən olan texniki cəhətdən yetkin, həm də döyüş ruhuna malik idmançıdır. "Marretinha" ləqəbli Bonfim, həm qardaşı İsmayel Bonfim ilə, həm də öz peşəkarlığı ilə fərqlənir. Onun döyüş üslubu braziliyalı döyüşçülərə xas olan cəsarətli təzyiq və zərbə ardıcıllığı üzərində qurulub. Yerdə isə o, jiu-jitsu ustası kimi boğucu texnikaları ilə rəqiblərinə nəfəs alma imkanı vermir. Qabriel Bonfim və Rendi Braun əslində 11 oktyabrda Braziliyada döyüşməli idilər, həmin gecə əsas qarşılaşmada Çarlz Oliveyra Mateuş Qamrot üzərində ikinci raundda boğma ilə (submission) qələbə qazanmışdı.
Bu qarşılaşma Bonfim üçün imtahandır: Rendi Braun kimi təcrübəli rəqibə qalib gəlsə, o, 77 kq çəki dərəcəsində 14-cü yeri qoruya biləcək.
Yamaykada doğulmuş Rendi Braun Nyu-Yorkda böyüyüb və "Rude Boy" ləqəbini elə küçə döyüşlərində qazanıb. Uzun qolları, çevik hərəkətləri və təmkinli üslubu ilə o, məsafə döyüşlərinin ustasıdır. Onun üstünlüyü - taktiki sabitlik və əks zərbələrdə iti reaksiya.
Əgər Bonfim hücuma arxayınlaşsa, Rendi bu boşluqları dərhal cəzalandıra bilər. Təcrübə onun tərəfindədir, lakin motivasiya - gənc braziliyalının. Bu, gənclik enerjisi ilə səbirin toqquşması olacaq.
Amerikalı Mett Şnell - təcrübəli flayveytdir (57 kg, flyweight). O, artıq bir neçə dəfə sıralamalardan düşüb, amma həmişə geri dönməyi bacarıb. Şnelın əsas silahı - yüksək temp və boğucu hücumlar.
Cozef Morales isə bu fürsəti öz karyerasının dönüş nöqtəsinə çevirmək istəyir. Sakit xarakterli, amma aqressiv üslubda döyüşən Morales yerüstü nəzarətdə bacarıqlıdır, ancaq Şnell kimi çevik rəqibə qarşı bu kifayət edəcəkmi? Bu sual turnirin gizli intriqasıdır.
Rusiyalı Muslim Salixov, "Kunq-fu Kralı" kimi tanınır. O, dünyanın ən titullu vushu sanda ustalarından biridir. Onun zərbələri dəqiqlik və incəliklə seçilir.
Uroş Mediç isə Serbiyadan gələn gənc, lakin təhlükəli döyüşçüdür. O, daha impulsiv, daha aqressivdir. Əgər Mediç döyüşü partlayışa çevirsə, təcrübəli Salixov üçün bu, riskli olacaq. Lakin texniki baxımdan üstünlük hələ də Muslimdədir.
Riki Simon - Amerika döyüş məktəbinin təmsilçisidir, güləş bazası ilə tanınır. Onun üstünlüyü yıxış və nəzarət üzərində qurulmuş təzyiq sistemidir.
Raoni Barselos isə keçmiş milli braziliyalı güləşçidir, amma son dövrlərdə daha çox zərbə üslubuna yönəlib. Bu döyüşdə hər iki tərəf üçün təməl sual eynidir: "kim öz oyunun tempini qəbul etdirəcək?". Barselos üçün bu, karyerasını yenidən canlandırmaq şansıdır.
İngiltərədən olan Kristian Leroy Dankan həm texniki, həm də estetik döyüş tərzi ilə seçilir. Onun hərəkətləri bir rəssamın fırçası kimi dəqiq və planlıdır.
Braziliyalı Marko Tulio isə UFC-də yeni addımlarını atır, lakin yer döyüşlərində təcrübəsi az deyil. O, fiziki baxımdan üstün olsa da, Dankanın zərbə tempi ilə ayaqlaşmaq asan olmayacaq. Bu qarşılaşma gələcəyin potensial ulduzunu müəyyən edə bilər.
İsmayel Bonfim - gecənin diqqət mərkəzində olan digər braziliyalıdır. O, Qabrielin böyük qardaşıdır və bu gecə ailə şərəfi uğruna döyüşəcək.
Rəqibi Kris Padilla isə ABŞ-dan gələn sərt və dözümlü döyüşçüdür. Onun üslubu daha "xam", amma təbii gücə söykənir. Bonfim isə daha cilalanmış, texniki cəhətdən düşünülmüş şəkildə döyüşür. Bu döyüş təkcə reytinq məsələsi deyil - bu, qardaşlığın, iradənin və milli qürurun döyüşüdür.
Bu gecə ulduzların yox, adını ulduzluğa yazdırmaq istəyən döyüşçülərin olacaq. UFC-nin APEX Arenasında 8 noyabr - yeni adların doğulduğu gecə kimi tarixə düşə bilər. Bəziləri üçün bu sadəcə döyüş, digərləri üçün isə bir ömürlük fürsətdir.
Bünyad Qaraxanlı
