"Fənərbağça" klubunun futbolçusu Romelu Lukaku Belçika millisindəki karyerasını başa vurub.
Oxu.Az xəbər verir ki, 33 yaşlı hücumçu bu barədə sosial şəbəkə hesabında paylaşım edib.
O, milli komandada keçirdiyi 16 ilin möhtəşəm təcrübə olduğunu vurğulayıb:
"Bu 16 il ərzində milli komanda üçün əlimdən gələni etdim. Bütün mümkün emosiyaları yaşadım. Möhtəşəm komanda yoldaşlarımla oynadım. Məni daim inkişafa təşviq edən və komandaya kömək üçün mənə güvənən bütün məşqçilərə təşəkkür edirəm. Bu, möhtəşəm bir yol idi və hər anından zövq aldım".
Lukaku Belçika millisinin azarkeşlərinə də təşəkkür edib. O, dörd dünya çempionatında və üç Avropa çempionatında millinin formasını geyinib.
Qeyd edək ki, Romelu Lukaku Belçika millisində debütünü 2010-cu il martın 3-də Xorvatiyaya qarşı keçirib. O, yığmanın heyətində 135 oyunda 94 qol vuraraq komandanın tarixində ən məhsuldar futbolçu olub. Lukaku 2018-ci ildə Rusiyada keçirilən dünya çempionatında Belçika ilə bürünc medal qazanıb.