"Turan Tovuz" - "Araz-Naxçıvan" oyununda qırmızı vərəqə göstərilməli idi?

Azərbaycan Futbol Federasiyaları Assosiasiyasının (AFFA) Hakimlər Komitəsinin sədri Frank De Blekere "Turan Tovuz" - "Araz-Naxçıvan" matçındakı mübahisəli epizoda aydınlıq gətirib.

Oxu.Az xəbər verir ki, De Blekere Naxçıvan təmsilçisinin hücumçusu Ramon Maçadonun 13-cü dəqiqədə topa oynamaq istədiyini bildirib.

"Ayağının ucu ilə "Turan Tovuz" komandasının oyunçusu Roderik Millerin baş nahiyəsinə zərbə endirir. Hakim oyunçunun düşüncəsiz davranışına görə ona sarı vərəqə göstərir. Təlimatlara əsasən, "Araz-Naxçıvan"ın oyunçusunun topa baxdığını və topa oynamaq istədiyini nəzərə alaraq, verilən sarı vərəqəni dəstəkləyirik. O, ayağının ucu (butsun altı ilə deyil) ilə müdafiəçinin başına/üzünə aşağı intensivliklə və o qədər də güclü olmayan zərbə endirir. Təhlükəli vəziyyət olsa da, "Araz-Naxçıvan"ın oyunçusunun etdiyi qəsdən təmas/qayda pozuntusu deyil", - deyə De Blekere vurğulayıb.

Qeyd edək ki, görüş "Araz-Naxçıvan"ın 1:2 hesablı qələbəsi ilə bitib.