"Qarabağ"ın qələbəsi Azərbaycanın UEFA-nın reytinqindəki yerinə təsir edibmi?

Dünən avrokubokların II təsnifat mərhələsinin cavab oyunlarının ilk günündən sonra UEFA-nın yenilənmiş əmsallar cədvəli dərc olunub.

Oxu.Az xəbər verir ki, Çempionlar Liqası və Konfrans Liqasında baş tutan matçlar Azərbaycanın mövqeyinə təsir etməyib. "Qarabağ" "Linkoln" üzərində 5:0 hesablı qələbə ilə ölkəmizə 0.250 xal (bu mərhələdə qələbəyə görə verilən bir xal komandaların sayına (dörd) bölünür) qazanc gətirib.

Xal hesabı 18.000-ə yüksələn Azərbaycan 24-cü sırada qərarlaşıb. Cari mövsümün qazancı 1.250 xala çatıb - "Zirə" və "Qarabağ" hərəyə 0.500 xal, "Sabah" isə 0.250 xal əldə edib. Cədvəldə bizdən öndə olan Rusiyanı ötmək mümkündür - hazırda şimal qonşumuzdan 0.299 xal geridəyik və ölkənin heç bir klubu qitə turnirlərində iştirak etmir, amma bizdən arxada olan Slovakiya ilə fərq də azdır - cəmi 0.125 xal.

Qeyd edək ki, cədvələ İngiltərə başçılıq edir - 89.160 xal.