Monteneqronun Ultsin şəhərində XXXV şahmat üzrə klublararası Avropa Kubokuna start verilib.
Oxu.Az xəbər verir ki, bu yarışda debüt edən “Vüqar Həşimov” klubu ilk görüşündə Belçikanın “Fontan” komandasına 5:1 hesabı ilə qalib gəlib.
Bu görüşdə yeganə məğlubiyyəti, komandamızın lideri sayılan Rauf Məmmədovun ukraynalı həyat yoldaşı, dördüncü lövhədə çıxış edən Nataliya Buksa alıb. Digər beş şahmatçımız görüşlərini qələbə ilə başa vurub.
Şəhriyar Məmmədyarovun çıxış edəcəyi Şimali Makedoniyanın “Alkaloid” klubu Nərgiz Umudovanın (həyat yoldaşı Niderlanddan olduğu üçün bu klubda oynayır – S.M.) çıxış etdiyi Belçikanın “Eşikye Mözan” komandasını 5:1 hesabı ilə məğlub edib. Nərgiz Umudova dördüncü lövhədə Yuri Krıvoruçkoya uduzub. Şəhriyar Məmmədyarova isə Rumıniyadakı yarışı ilə əlaqədar olaraq iki turluq icazə verilib.
Nicat Abbasovun çıxış etdiyi Avstriyanın “Rayka Rapid” klubu Finlandiyanın “Ninya” komandasını eyni hesabla məğlubiyyətə uğradıb. Birinci lövhədə çıxış edən Nicat qələbə qazanıb.
Qadınların yarışında isə SOCAR-ın maliyyələşdirdiyi “Odlar Yurdu” komandası İsrailin “Rişon Letsion” komandasını darmadağın edib – 4:0. Hazırda “Odlar Yurdu” iki xalla İtaliyanın “Saissa Pentole Anyelli” və Çexiyanın “Novı Bor” klubları ilə birgə ilk üç sıranı paylaşır.
Qeyd edək ki, “Vüqar Həşimov” klubu bu tur Sloveniyanın “Maribor” komanda ilə görüşəcək. “Odlar Yurdu” isə bu gün ilk turda heç-heçə etmiş Gürcüstanın “Nona” klubu ilə qarşılaşacaq.
Səbuhi Musayev
