Yaşını saxtalaşdıran futbolçu iki, klub prezidenti üç illik diskvalifikasiya edildi

Boliviya Futbol Federasiyasının İntizam Komitəsi futbolçunun yaşını saxtalaşdırdığı üçün yerli "Avrora" klubunu cəzalandırıb.

Oxu.Az "TyC Sports"a istinadən xəbər verir ki, araşdırma nəticəsində "Avrora"nın hücumçusu Qabriel Montanyonun adının əslində Dieqo Montanyo olduğu üzə çıxıb.

Sözügedən oyunçunun yaşının sənəddəki kimi 20 deyil, 25 olduğu müəyyənləşib.

Nəticədə klubun 33 xalı silinib. Həmçinin futbolçu iki, klubun prezidenti Xayme Kornexo isə üç illik diskvalifikasiya edilib.

Montanyo klubda 21 matça çıxaraq səkkiz qol və bir məhsuldar ötürmə ilə yadda qalıb.

Qeyd edək ki, komanda ötən mövsümü 48 xalla dördüncü pillədə bitirib. Məlum insidentə baxmayaraq, ötən çempionatın nəticələri dəyişməz qalacaq.