"WhatsApp"a yeni funksiyalar və təkmilləşmələr gəldi

"WhatsApp" mesajlaşma tətbiqinin tərtibatçıları proqrama bir sıra yeni funksiyalar və təkmilləşmələr əlavə edən böyük yeniləməni elan ediblər.

Oxu.Az-ın verdiyi məlumata görə, bu barədə şirkətin bloqunda məlumat verilib.

Beləliklə, istifadəçilər artıq təkcə videozənglər üçün deyil, həm də çatlarda şəkil və video yaratmaq üçün istifadə edilə bilən 30 yeni fon, filtr və kamera effektinə çıxış əldə ediblər.

Həmçinin öz selfiləri əsasında stikerlər yaratmağa imkan verən funksiya da əlavə edilib. Bunun üçün stiker nişanına vurmaq, "Yarat" seçimini seçmək və şəkil çəkmək kifayətdir.

Bundan əlavə, istifadəçilər bəyəndikləri stiker dəstlərini birbaşa çatda həmsöhbətləri ilə paylaşa və mesajlara iki dəfə vurmaqla reaksiya verə bilərlər, bundan sonra mesaja tez-tez istifadə olunan reaksiyalardan biri əlavə olunacaq.

Funksiya artıq "Android" istifadəçiləri üçün mövcuddur və tezliklə "iOS"da da əlçatan olacaq.