Azərbaycanda yanacağın - benzinin keyfiyyətinin aşağı olması hamıya məlumdur, yəni gizlin bir şey deyil.
Oxu.Az Modern.az-a istinadən xəbər verir ki, bunu ekspert İlham Şaban son zamanlar benzinin keyfiyyətinin aşağı olması ilə bağlı yayılan məlumatları şərh edərkən deyib.
Ekspert bunun səbəbini ilk növbədə qurğuların köhnə olması ilə əlaqələndirir:
“Bildiyiniz kimi Dövlət Neft Şirkəti yeni neftayırma zavodu tikintisinə start verəcək. Bu səbəbdən də moderinizasiya işləri aparılmır. Hələ 2008-ci ildə Nazirlər Kabineti Qaradağda yeni emal müəssisəsi yaradılması ilə əlaqədar göstəriş vermişdi. Həmin layihə çox böyük kapital tələb etdiyindən yubandı. Çünki qaz emalı, qaz-kimya, “Azərkimya”nın müəssisələrinin köçürülməsi, elektrik stansiyası və s. nəzərdə tutulduğundan bu, təkcə Neft Şirkətinə aid olan məsələ olmadı. Buna görə də Nazirlər Kabinetinin sonuncu iclasında prezident İlham Əliyev bildirdi ki, Dövlət Neft Şirkəti 2018-ci ilə qədər Avro-5 standartında yanacaq istehsal etməlidir.
Bu ilin aprel ayından etibarən SOCAR ilk moderinizasiya işlərinə başlayıb. Proses ona gətirib çıxaracaq ki, benzinin və dizel yanacağının həcmi artırılacaq, eyni zamanda Avro-3 standartına cavab verəcək benzin istehsal olunacaq. Bu da ilk növbədə benzinin keyfiyyətinin yaxşılaşdırılmasına xidmət edəcək”.
İlham Şaban benzinin keyfiyyəti yaxşılaşdırılandan sonra qiymət artımının olacağını da istisna etmir:
“Avro-5 standartına keçid üçün tamamilə yeni qurğu tikiləcək. Bunun üçün də SOCAR yüz milyonlarla investisiya xərclərinə getmiş olacaq. Sonuncu dəfə yanacağın qiymətinin artımının 2013-cü ilin dekabrında olduğunu, həmçinin beynəlxalq təşkilatların Azərbaycandakı enerji daşıyıcıları ilə bağlı verdiyi proqnozları (onlar 2017-ci ilə qədər artım proqnozlaşdırmırlar) nəzərə alsaq, layihənin həyata keçirilməsinə başlanıldığı zaman qiymət artımı mütləq olacaq”, ekspert deyib.
