Fuad Nağıyev: "İlk dəfədir ki, turizm COP gündəliyinə inteqrasiya olunur"

"Tarixdə ilk dəfədir ki, turizm COP gündəliyinə inteqrasiya olunur".

Oxu.Az xəbər verir ki, bu sözləri Azərbaycan Respublikası Dövlət Turizm Agentliyinin sədri Fuad Nağıyev COP29-da Turizm Günü çərçivəsində turizm sektorunda təkmilləşdirilmiş iqlim fəaliyyəti üzrə nazirlərin birinci görüşündə çıxışı zamanı deyib.

O bildirib ki, bu an tarixi bir hadisədir, çünki turizm iqlimlə bağlı qlobal söhbətin mərkəzində öz layiqli yerini tutur:

"COP29-a ev sahibliyi edən ölkə kimi, Azərbaycan bütün sektorlar üzrə iqlim tədbirlərini irəlilətməyə dərindən sadiqdir. Bu gün biz iqlim dəyişikliyi ilə mübarizədə turizmin həlledici rolunu müzakirə etmək üçün dünyanın hər yerindən nazirləri, liderləri və maraqlı tərəfləri bir araya gətirməkdən şərəf duyuruq".

F.Nağıyev deyib ki, qlobal turistlərin sayı artmağa davam edərkən tədbirlər görmədikcə sektordan emissiyaların artacağı proqnozlaşdırılır:

"Bu gün biz yolayrıcındayıq. Turizm sektoru ya adi iş yolu ilə davam edə bilər, ya da transformasiyanı aşağıkarbonlu və bərpaedici gələcəyə aparmaq üçün yol göstərə bilər. Biz inanırıq ki, turizm həllin bir hissəsi olmaq imkanına malikdir.

Bugünkü turizm nazirləri tədbiri turizm sektorunda əməkdaşlıq və fəaliyyətə zəmin yaratmaq üçün bir fürsət kimi xidmət edir".

Aygün Mirakif